St. Paulus School conhuntamente cu Filomena College MAVO y Comision di Christmas Fair a dicidi di uni pa organisa diferente actividad pa cuminsa celebra Pasco na districto di San Nicolas.

E idea a bin pa dia 8 di december henter e pueblo di Aruba bay bishita San Nicolas y e actividadnan cu ta bay tin na tres diferente punto, Filomena College, St Paulus School y na Promenade San Nicolas, na momento cu personanan lo bishita e tres locacion aki por saca un potret, ta scaner un QR Code y ta haya e posibilidad di gana premionan.

“Paseo Navideño na San Nicolas” ta cuminsa 6or di atardi y for di 7or te cu 11or di anochi por uni na e Christmas Fair.

Raquel Lampe director di Filomena College a señala cu pa cuminsa e dia aki nan ta bay tin un actividad denomina “Taste of Christmas 2023” na unda cu studiantenan do scol aki a traha nan obranan di man, ademas nan lo bay haci un “biahe culinario” e cual ta forma parti di e proyecto di Spaño unda hendenan ta bay haya cumindanan di varios pais por ehemplo di Republica Dominicana, di Sint Maarten, Jamaica, Colombia, Spaña, Mexico, Venezuela, entre otro.

“Ta un iniciativa bunita pa asina nos uni forsa y e actividad por bira mas grandi, diabierna awor ta na San Nicolas bo mester ta,” Lampe a sigura.

Eltienne Yarzagaray docente na St.Paulus School e mesun di aki ta presenta nan “Chistmas Village” unda ta bay tin presentacion di studiantenan cu ta forma parti di Leerorkest Aruba, entre otro presentacion musical, gaming, dinojump, cuminda varia y nan famoso tent di rifa cu mas di 300 premio.

E evento aki di St Paulus College ta cuminsa 6or di atardi te cu 9or di anochi.

“Comunidad di Aruba y San Nicolas por bin experiencia cada evento cu lo tin unda cada un di nan ta bay ta diferente,” Yarzagaray a sigura.

Tito Bolivar di Christmas Fair a señala cu dia 8 di december ta bay tin diferente cos cu lo pasa na San Nicolas cu scolnan di fiesta hunto cu Promenade y su Christmas Fair unda cu pa 7.30 di anochi tur e caya di Promenade ta bay ser ilumina cu luznan di Pasco , Galeria Artisa hunto cu un galeria nobo ta bay habri su portanan pa publico 7.30 di anochi ademas di benta di productonan local hunto cu un ambiente musical.