Ta Dia di Prensa atrobe. Motibo pa skirbi algo ta relevante y util, no pa nos mes na promer lugar, sino pa publico en general. Tur dia publico ta haya su mes confronta cu un cantidad di informacion, sigur pasobra awendia no ta solamente prensa skirbi nos tin, y radio y television, sino un avalancha di informacion via internet. Den e avalancha aki ta bira mas y mas dificil pa distingui kico ta informacion confiable y kico no. A surgi e fenomeno di ‘fake news’ cu en principio ta trata di informacion falso, basa riba ‘hecho’ cu nunca a tuma lugar, o en todo caso no den e contexto cu ta pretende. Riba esaki nos a haya otro fenomeno, principalmente di banda politico, unda ta probecha pa yama tur cos cu no ta di agrado di e persona, ‘fake news’, loke no necesariamente ta e caso.

Pero den e confusion aki di kico ta berdad y kico ta engaño, ta importante pa por lo menos por conta cu e certeza cu un medio di comunicacion tin un manera di traha cu ta garantiza te na cierto altura cu loke ta publica ta basa riba hecho real. Pa loke ta noticia ‘fake’ na nivel internacional, tin un manera bon pa check esaki, y esey ta cu por consulta semper e medionan internacional grandi, cu no ta publica cualkier noticia cu yega na nan mesa. Noticia mester pasa den un proceso di verificacion cu ta elimina pa un gran parti e probabilidad di noticia falso. Y tuma na cuenta cu ora ta traha fake news, hopi biaha ta usa e formato y hasta portada di un medio grandi internacional, pa aumenta e credibilidad di e noticia falso. Si sin embargo e medio mes riba su portal no ta mustra e noticia, ta obvio cu ta trata di fake news.

Y con ta haci esaki ora ta trata di noticia local? Nos por conta semper cu verificacion contundente? Esey ta depende di e practica interno di cada medio, y di e posibilidadnan di verifica noticia. Nos sa kico ta nos normanan interno pero fuera di esey nos no sa ni ta comenta riba practica y custumber di otro medio. Sin embargo, no tin un cuadro general di loke ta bon periodismo, cu un ciudadano por usa como cuadro di referencia? Por ehemplo, ora hende ripara cu tin cierto periodista o medio cu no ta actua enteramente segun ‘e reglanan di wega’, kico e reglananey ta? E reglanan t’ey, pero den forma di norma general di e federacion internacional di periodista. Nos tin den nos Constitucion regla general cu ta delinea e derechonan di liber expresion pa ciudadano y medio, y nos tin ley special pa radio y television. Pero finalmente, ora un ciudadano ta haya cu un medio di comunicacion no a trat’e debidamente, e recurso cu ta keda ta e caminda pa corte, unda huez por sentencia cu e medio no a actua segun reglanan di ley, pasobra difamacion y otro tipo di daño na reputacion di un ciudadano ta asunto cu ta describi den ley.

Pero prensa ta mas cu duna noticia corecto. Prensa t’ey tambe pa duna informacion. Y mayoria di nos ta haya cu un comunidad sin informacion debido, no por prospera. Un parti importante di informacion mester bin di gobernacion.Y aki ta unda nos ta topa cu cierto problema specifico cu tin di haci cu e manera di opera di esnan cu mester duna informacion, especialmente si ta trata di gobernacion. Den un carta reciente cu un grupo di periodista a presenta na Formador y e dos partidonan cu lo sostene gobierno nobo, a mustra entre otro riba e problema structural di hopi director y hefe di departamento cu no ta dispuesto di comparti nada cu prensa, sin consulta tur cos cu despacho di ministro, y den hopi caso ta pasa e asunto pa e despacho, hasta si ta trata di asunto cu e departamento mester contesta. Ta parce cu tin un tipo di prohibicion pa duna informacion sin autorizacion, y si acaso mes no ta existi un prohibicion explicito, e temor pa asumi cierto responsabilidad pa nan area di trabao ta haci cu pa tur cos ta referi na e mandatario. Y naturalmente por dura hopi tempo promer cu bin un contesta, si acaso tin uno. Semper lo keda naturalmente e diferencia entre e medionan cu ta liga na e gobierno di turno, cu naturalmente no tin tanto keho. Nan ta haya suficiente informacion, hasta esun cu nan no mag, y no lo divulga tampoco.

Pero poniendo esey un banda, nos ta haya cu tin hopi cos pa mehora. Y hopi di esaki no tin nada di haci cu tema politico cayente, pero simplemente informacion basico cu ta resulta di e obligacionnan cu gobierno tin pa recolecta informacion sistematicamente y pone tur esaki na disposicion di nos. Por ehemplo, nos ta na altura cuanto tratado internacional tin, riba cual tin un obligacion pa gobierno reuni informacion, y publica esaki? Djis pa menciona un ehemplo, bao di e convencionnan di ILO cu nos pais a suscribi, tin un cantidad di informacion cu mester bay pa comunidad. Nos a yega di tende di algo cu a sali di esaki? Esey no ta culpa di gobierno so; ki dia prensa ta pone presion pa haci nan trabao mihor?

LEAVE A REPLY

Please enter your comment!
Please enter your name here