Awe ta celebra Dia Mundial di Turismo, y e aña aki, e enfoke ta riba futuro. Segun Nacionnan Uni, mientras recuperacion ta andando den e sector, y ampliando riba reconocemento politico y publico sin precedente pa e sector aki, UNWTO, e Agencia Mundial di Turismo di Nacionnan Uni ta resalta e oportunidad pa reconsidera con nos ta anda cu turismo.

Esaki ta nifica pone hende y e planeta prome, y trece tur hende, desde gobierno y negoshinan te comunidadnan local hunto rond di un vision comparti pa un sector mas sostenible, inclusivo y resiliente.

Yegada di turistanan internacional na comienso di e aña aki tabata dobel loke a registra na 2021. Den algun region, yegada ya ta na nivelnan igual of mas halto cu prome cu pandemia. Eliminacion di e restriccionnan di biahe cu ainda tabata resta, ademas di aumento den confiansa di consumidor, ta bay ta drivernan importante pa recuperacion di e sector, treciendo speransa y oportunidad na miyones di persona rond mundo.

Ta bay celebra Dia Mundial di Turismo mientras e cambio pa reconoce turismo como un pilar crucial di desaroyo y progreso ta bon na caminda. Mei 2022 a marca e prome biaha cu Asamblea General di Nacionnan Uni a tene un debate special riba turismo, ilustrando e relevancia historico di e sector. Awo turismo ta riba agenda di gobierno y organisacionnan internacional den tur region global.

Na mes momento, destinacionnan y negoshinan ta adaptando proactivamente pa surpasa reto y cumpli cu responsabilidadnan, manera a keda ilustra cu e ola di firmantenan di e Declaracion di Glasgow riba Accion di Clima den Turismo, dirigi pa UNWTO.

E tema di e aña aki, “Reconsiderando Turismo” ta bay refleha esaki. E tin meta pa inspira e debate rond di reconsideracion di turismo pa desaroyo, incluyendo mediante educacion y trabao, e impacto di turismo riba e planeta y oportunidadnan pa crece mas sosteniblemente.

Na Aruba, ta celebra e dia aki awe cu un Simposio organisa pa Aruba Tourism Authority, pa socionan local di industria turistico. Alabes esaki ta bay fungi como e apertura oficial di nan conferencia Aruba Meets Europe, cu ta bay conta cu participacion di socionan internacional.

Tambe presente ta bay tin studiantenan di Unidad di Hospitalidad y Turismo di EPI y Facultad di Turismo di Universidad di Aruba.

LEAVE A REPLY

Please enter your comment!
Please enter your name here