Minister di Salubridad Publico, Dangui Oduber a declara cu despues di e bishita di dos dia cu e siman aki representantenan di ministerio di Salubridad Publico y Medio Ambiente di Hulanda (RIVM) ta realisa na Aruba, nos isla ta cla pa ricibi e prome lote di e vacunanan di Pfizer.

Ayera nan tabata na spera di e aprobacion oficial di Hulanda pa asina Aruba por haya luz berde pa e vacuna. “Mi ta convenci cu Aruba a cumpli cu tur e rekisitonan,” el a bisa.

Prome cu e temporada di horca cuminsa 1 di juni proximo, Hulanda tin pensa pa e islanan di Reino tin vacuna mas cu un 85% di nan poblacion. E prome lote cu nos lo haya e ta suficiente pa vacuna e prome grupo di prioridad. Dialuna Aruba lo haya sa kico ta e cantidad exactamente cu nos lo ricibi hunto cu e demas islanan di Reino Hulandes.

El a expresa su gradicimento na tur envolvi den e proceso di e vacuna. Tambe el a indica cu nos mes como pais a tin como meta pa e prome kwartaal por duna e vacuna na e gruponan mas vulnerabel di comunidad. Tambe pa e dunadonan di cuido y esunnan cu ta traha den ICU y tur e persona relaciona cu salubridad.

Un aspecto cu -segun e mandatario- e representantenan di RIVM a keda asombra ta e uzo di innovacion y tecnologia cu nos pais ta uzando pa registra tur loke tin di haci cu henter e proceso di vacunacion. Aruba ta mustrando cu nos ta mas delanta cu otro paisnan den region. E mandatario a bisa cu e ta sumamente contento y orguyoso di e team cu a bin trahado incansablemente pa presenta un bon plan di ehecucion di e vacuna na RIVM.

El a informa cu Colegio EPI a cay afo como centro di vacunacion. Nan ta bay haci uzo JFK Education Center como e localidad na Playa pa aplica e vacuna. E pre-registracion di e vacuna lo wordo haci via e aplicacion Aruba Health App Vaccine cu lo cuminsa 1 di februari. Esun cu no tin acceso pa registra di e forma aki, nan lo habri e posibilidad di haci’e den e diferente localidad di MFA cuminsando dia 8 di februari.

 

E fecha tentativo cu Aruba lo bay haya e prome vacunanan lo ta 15 di februari. E di dos lote di vacuna nos lo haya e di dos siman di maart, y asina consecutivamente, entre dos pa tres siman, Aruba lo keda ricibi e vacunanan aki. Ya caba un campaña a cuminsa pa informa y conscientisa nos comunidad riba importancia di e vacuna.

Vacuna y proteccion

E mandatario a bisa cu e vacuna ta importante pa proteha nos propio salud y crea un comunidad immuun na e virus. Pero tambe pa nos por recupera nos turismo y economia. Pa logra un comunidad cu inmunidad nos mester tin entre 70% pa 75% di nos poblacion vacuna. P’esey e ta recomenda pa cada un di nos conseha y stimula mas hende posibel pa tuma e vacuna.

El a bisa cu otro punto cu el a trata cu RIVM tin di haci cu e vacuna cu ya caba a wordo suministra na Hulanda, y si nan tabatin efectonan colateral cu nos na Aruba mester ta preocupa pe. Nan a informa cu e cantidad di dosis ta mas cu 162 mil cu nan a duna caba na Hulanda. Di nan no tin niun persona cu a duna indicacion di por haya un reaccion of señal cu por ta motibo di preocupacion.

E no ta nenga cu por tin reaccion manera tur otro vacunanan, pero no ta un motibo di preocupacion serio. P’esey e mandatario a agrega cu nan como gobierno ta conseha mas hopi hende posibel pa tuma e vacuna aki.

 

LEAVE A REPLY

Please enter your comment!
Please enter your name here