Den dos control totalmente distinto Cuerpo Policial di Aruba ta para auto y haya hobennan cu arma den auto. Polis ta lamenta cu cada bes atrobe ta nota cu hobennan ta scoge pa e caminda robes, mayoria biaha cu un edad relativamente hoben. Ta haci un apelacion riba mayornan pa ta mas atento riba nan yiunan, pa cu uzo di arma y pa yega na placa facil.
Awe marduga mas o menos 1:46 am den e parkeerplaats di “The Village Mall” situa dilanti Hilton Resort na Palm Beach, un accion relampago di un patruya a conduci na dos detencion cu probablemente lo soluciona un caso di ladronicia di placa. E polisnan tabata teniendo un patruya rutinario den e parkeerplaats ora a nota dos mucha homber sinta nan so den un auto marca Toyota, modelo Glanza cu number. E auto tabata cendi pa cual Polis a dicidi di bay tira un control. Pero pasando banda di e auto a haya un holo fuerte di Marihuana, locual a conduci cu e Polisnan a baha pa haci un control mesora riba posesion di droga.
Ora a nota Polis, e chauffeur a paga su sigaria di Marihuana y a puntra si nan tin problema pa Polis controla den e auto. Asina cu nan a duna OK, a cuminsa controla y den auto patras a topa un rugtas den cual a topa cu un arma di candela den dje. Tambe a nota cu den e tas tabatin saconan di placa di papel y saco di plastic cu placa los, mustrando claramente cu aki por ta trata di “wisselgeld” di un negoshi. Teniendo cuenta cu ta trata di dos hoben, humando droga, den posesion di un arma di candela y un tas yena cu placa, ta suficiente motibo pa detene ambos, esta Q.K.A.C y J.A.U.F. Tur dos a keda encarcela pendiente e investigacion cu awo a cuminsa.
Otro caso
Den e otro caso cu a tuma luga dialuna mainta polis a para un hoben di 18 aña coriendo un Toyota Tercel color cora coriendo sospechoso. Ora Polisnan a pasa banda di e auto, mesora e chauffeur a aumenta velocidad, locual a pone cu Polisnan a bay su tras y a par’e na altura di e rotonde di Pos Chikito. Despues cu e lrista e auto e hoben a keda deteni. Un rato despues e doño di e auto tambe a presenta di 22 aña kende tambe a keda deteni. Cu e detencionnan aki awor Polis lo investiga e motibo dicon a actua sospechoso, dicon ta cana cu arma di candela den auto y si por tin cualkier delito contra ley cu e hoben aki lo a caba di comete.
