Diamantanan a keda scondi pa 4.5 biyon aña prome cu un erupcion volcanico violento a trece nan na superficie. A descubri un reserva antiguo di diamanta, mes bieu cu luna, cerca di centro di Tera, como 410km bou di superficie.

Un grupo internacional di cientifico a midi isotope di helium – diferente forma atomico di helium – den e diamanta pa haya e reserva antiguo, segun un estudio publica den Science.

Investigadonan ta bisa cu nan a actua como ‘capsula di tempo perfecto’, dunando un bista den e periodo tumultoso net despues cu e planeta a forma. Durante e periodo aki tabatin tanto actividad geologico violento, cu casi nada di e structura original di e planeta a permanece.

Sinembargo, entre tur e cambio aki, tabata sospecha cu tabatin un area, algun caminda entre e ‘crust’ y e ‘centro’, cual tabata relativamente sin disturbio. Te awo, no tabatin prueba. E prome pistanan a yega den añanan 1980, ora cientificonan a nota lava den sitionan particular tabatin un ratio di helium-3 pa helium-4 mas halto cu normal, algo cu ta coincidi cu e ratio haya den meteoritonan cu a crash riba Tera. “Esaki a sugeri cu e lava a bin di un reserva profundo den Tera, cu no a cambia pa biyonnan di aña.

Pa haya sa mas, investigadonan a studia ratio di isotope di helium den diamantanan ‘super profundo’ cu a forma entre 150 pa 230km bou di ‘crust’ di Tera.

“Diamanta ta e substancia natural conoci di mas duro, mas indestructibel, pues nan ta forma un capsula di tempo perfecto cu ta duna nos un bentana pa mira den profundidad di Tera”, segun Dr Suzette Timmerman, di Universidad Nacional di Australia, lider di e investigacion. “Nos a logra extrae gas helium for di 23 diamanta ‘super profundo’ di area Juina na Brazi;. Esaki a mustra e composicion isotopico caracteristico cu nos lo spera di un reserva hopi antiguo, confirmando cu e gasnan ta resto di un tempo na cual, of hasta prome cu, e luna y Tera a boks.”

 

LEAVE A REPLY

Please enter your comment!
Please enter your name here