Proyecto di agroforesteria sintropico ta conitnua. Diasabra 20 di arpil St. Paulus School ta e proximo scol ta ricibi su hardin di alimentacion riba tereno di scol y ya caba preparacionnan a cuminsa pa esaki.
E proyecto di agroforesteria sintropico ta un proyecto unda e scolnan cu ta participa ta ricibi sosten tanto for di Santa Rosa Aruba y Living Soil, como tambe for di Gobierno di Aruba pa desaroya un hardin cu ta provee alimentacion y asina inculca e balor pa agricultura den e futuro generacion pa medio di tecnicanan sostenibel.
Aña pasa dia 1 di november Gobierno di Aruba a lansa e proyecto aki y a lansa e plataforma cu a duna oportunidad na e scolnan basico pa registra y participa na e proyecto aki. Dia 18 di januari a traves di un conferencia di prensa Minister Ursell Arends a anuncia e inicio oficial di e proyecto y e prome scol cu a ricibi e hardin di alimentacion, cual tabata Scol Basico Washington.
Den luna di maart caba Scol Bascio Washington a celebra un logro importante. Tabata trata di e prome cosechanan di e hardin di alimentacion di e scol aki.
Na mei di 2022 Living Soil Aruba a realisa un di e prome proyectonan di agroforesteria na Prinses Amalia School. Minister Arends a bishita e proyecto y a expresa cu esey ta loke tur e scolnan basico na Aruba tin mester y aworaki e proyecto di agroforesteria sintropico na scolnan basico a bira realidad.
E scolnan basico cu ta bay ta participando den e proyecto di agroforesteria sintropico ta Scol Basico Washington, Scol Primario Kudawecha, Colegio Hilario Angela, Colegio Conrado Coronel, Pius X School, Scol Caiquetio, Sint Paulus School, Play2Whizz Campus, Scol Basico Dornasol, Scol Paso pa Futuro, Mon Plaisir School y Grof Van Zinzendorf.
St. Paulus School ta e siguiente scol cu ta bay ricibi su hardin di alimentacion danki na e poryecto di agroforesteria sintropico. Pa haci esaki posibel nan ta rekeri di boluntarionan pa participa den e plantacion di e hardin di alimentacion diasabra awo. Tur cu ta interesa di brinda apoyo y sosten por registra pa asina participa y yuda St. Paulus School yega na e meta.
