E siman aki, un grupo di 37 mucha homber a presenta na entrada di Marinekazerne na Suffisant pa e Prome Formacion Militar (EMV) pa milicia di Corsou y Aruba. Den un tempo di casi 11 luna, e hobennan aki lo converti den militar di Aruba (10) y Corsou (27). Yen di curashi y confiansa nan lo cuminsa cu EMV.
E 11 luna di EMV ta consisti di 2 fase. E prome fase lo ta esun elemental. ‘Skills and drills’ lo ta riba un nivel individual y ta para central. E militarnan den training ta siña tocante rango y posicion, y tambe ta siña yuda bo mes y bo camaradanan. Tambe ta haya disciplina militar, y e hobennan ta siña tocante uzo di arma. For di e fase aki ta drenta e parti di entrenamento pa combate. E di tres y ultimo fase ta e parti di vigilancia y siguridad.
Segun un comunicado di prensa, prome cu nan a cuminsa EMV, e hobennan aki a pasa den proceso di keur y seleccion extenso. Esaki a consisti di test di landamento, idioma Hulandes, y Prueba di Condicion di Defensa. Den e ultimo prueba, e rekisitonan ta (1) core duro pa minimo 2,400 meter den 12 minuut; (2) push up minimo 20 biaha; (3) 30 sit ups minimo.
Formacion social, tareanan di vigilancia y siguridad, mas y mas ta dirigi nan mes riba trabounan militar operacional. E militarnan ta tuma parti den ehercicionan fuera di nan isla, ta keda involucra den dunamento di asistencia militar den Caribe, y ta train hunto cu Cuerpo Policial. Nan bentaha ta cu e yiunan di tera ta compronde idioma y cultura local, e situacion climatologico y geografico miho cu e militarnan Hulandes, algo cu ta duna un balor agrega na momento di training y asistencia.
