Den un señal cu Condor di California ta haciendo un ‘comeback’ den bida salvahe tres decada despues cu casi nan a bay den extinsion, un baby Condor a bandona su neishi y haci su prome intento pa bula den Zion National Park na Utah.
Bishitantenan siman pasa a mira e prome cria exitoso di e parke habri su halanan y sali di e cueba di su neishi riba un klif cora, den un bista cu a keda confirma pa biologonan di e parke. Tim Hauck, kende ta maneha e programa di reintroduccion di Condor pa e grupo The Peregrine Fund, a describi e vuelo di e Condor, di 4 luna y mey di edad, como ‘un caida controla’.
E poblacion sobreviviente di Condor di California awo ta conta cu mas di 500 individuo, cu mas di mita di e parhanan cu halanan di 3m bibando salvahe den un area incluyendo Arizona, California, Utah y nort Mexico. Otro Condornan a ser captura cu proposito di crianan of tene nan den zoologico.
Sikiera dos otro cria a nace na parke na Utah, pero a muri prome cu nan tabata suficientemente grandi pa bula. Park Rangers a duna e baby sobreviviente e apodo ‘1K’, pasobra e tabata e di mil baby Condor cu a sali di e esfuerso pa boost e poblacion.
“Nos tabata anticipando esaki henter berano, y nos ta emociona pa mira e baby continua siña con pa bula”, segun vocero di parke Eugene Moissa.
E mama y tata di e baby Condor ta e unico par cu cria identifica den e parke, y ta calcula cu nan ta hunto pa dos aña. E mama a nace na 2006 den zoologico di San Diego, y e tata a ‘hatch’ na 2009 na Boise, Idaho, prome cu a liber’e. Nan a nace como parti di un programa cu a cuminsa den añanan 1980 despues cu e cantidad di Condor di California salvahe tabata apenas 22. A captura e Condornan salvahe y tene nan captivo pa nan siguridad y a lansa e programa di criadero involucrando agencianan gubernamental, organisacionnan priva, ciudadano y biologonan.
“Ta un logro hopi special pa e programa di re- poblacion”, Hack a bisa. “Ta un recordatorio pa tuma tempo pa celebra e victorianan chikito, pero cu ainda tin hopi pa haci.”
