Diamars mainta Gobernador Fredis Refunjol a presenta na e apertura di e Aña Parlamentario nobo pa di 30 biaha y tabata pa di 31 biaha pa e discurso a tuma luga. Su mensahe no tabata pa lidernan politico so, sino tambe pa lidernan spiritual y empresarial cu a pesar di tanto diferencia di opinion, cu respet y dignidad conhuntamente mester sigui traha pa un miho futuro pa Aruba.
“Parlamento y Gobierno t’ey pa sirbi bienestar general, conciente di cuinteres general no ta igual na tur e interesnan particular. Discusion publico habri, di temanan importante pa nos comunidad, ta un elemento esencial pa un democracia bibo. Sinembargo nos tin e obligacion pa percura cu diferencianan di opinion no comberti den division di pueblo.”
“E ta e tarea di lidernan politico, empresarial, social, religioso, sindical y profesional, pa duna e ehempel di con ta discuti temanan importante pa nos comunidad, den un forma racional, sin ofensanan personal of uso di instrumentonan destructivo of descriminatorio. Opinionan diverso, aceptacion di desicionnan democratico a base di debate y dialogo ta esencial pa un estado di derecho.”
Finansa
Gobernador Refunjol tambe a subraya den su discurso cu e aña aki Gobierno di Aruba a presenta un presupuesto cu un deficit di 0.5% di GDP conforme e normanan di ley di supervision financiero temporario. E ta afirma cu ‘esaki ta un resultado cu a wordo alcansa cu hopi esfuerso y riba propio forsa.’ E ta sigui bisa cu e logro aki a wordo haci posibel danki na un maneho financiero balansa y sin ningun ayudo financiero externo.
A splica cu den cooperacion estrecho cu sector empresarial y gremionan pa aumenta e participacion di mas ciudadano den nos mercado laboral, ta mustra cu perspectativanan pa mas empleo den nos pais ta hopi positivo pa 2017 anto cu cifra di desempleo lo baha significantemente den comparacion cu algun aña atras.
Medio ambiente
Interesante ta cu Gobernador tambe ta mustra cu gobierno tin su deber pa proteccion di nos naturalesa. “Gobierno di Aruba ta conciente cu desaroyo socio-economico ta bay man den man cu proteccion di nos naturalesa.Gobierno a sa di mantene su mes na e tratado di Ramsar pa conservacion di Spaans Lagoen – un sitio reconoci den e tratado aki. Maneho di medio ambiente ta un di e areanan di maneho di mas compleho, pero tambe esun di mas esencial. Solucionan, desafortunadamente, no tin un efecto riba termino cortico. Como isla chikito den desaroyo, e ta pone un responsabilidad grandi riba nos gobernantenan, organisacionan no-gubernamental, gremionan y sector priva pa hunto pone schouder cu schouder pa asina yega na e balansa ideal.”
Atencion special na enseñansa
Gobernador Refunjol a remarca tambe cu gobierno ta bay cuminsa pone atencion na formacion profesional adicional. Esaki e ta bisa ta ‘’rekeri innovacion y cambio den un sistema di enseñansa y formacion di adulto cual pa decadanan a sirbi nos, pero cu awor mester refleha mas e necesidadnan y e posibilidadnan di formacion di e tempo moderno y globalisa cu nos ta biba aden’.
Lider di fraccion AVP y awor vice Presidente di Parlamento tambe, Rene Herdé ta comenta despues cu bo lo kier semper ricibi tiki mas detaye como cu ta apertura di Aña Parlamentario. ”Nos no tin e presupuesto ainda, mi ta kere nos ta bay hay’e den detaye. E Gobernador a accentua un par di cos y pone tur bao di e capa mañan mester ta miho cu awe. Si mi wak loke el a referi na dje, awe 2016 ta hopi mas miho cu 2009 caminda nos a cuminsa.”
Diferencia di opinion sin ofende
Lider di fraccion MEP Evelyn Wever Croes ta bisa Bon Dia Aruba cu Gobernador Refunjol a duna algun palabra cu e ta haya ta den su luga. “Un mañan miho cu awe ta algo cu mi ta spera nos por aplica berdad pa tur hende akinan den nos comunidad. Loke cu mi a gusta hopi di e discurso ta su mensahe final unda el a bisa cu a pesar di ki diferencia di opinion por tin, cualkier debate y con fuerte e por ta den comunidad ta bon pero mester bay den forma respetuoso sin tin mester di ofende hende.”
Refineria
Riba e tema di reapertura di refineria, Gobernador Refunjol a trece pa dilanti ta cu pa prome biaha den mas cu 90 aña cu Pais Aruba lo ta propietario di e refineria mientras cu Citgo lo opera e instalacionnan cual ta un logro sumamente positivo. ”E diligencia y perseverancia di Gobierno y su ekipo, consistiendo di expertonan local y internacional, tabata clave pa haya un partner cu por a cumpli cu rekisitonan socio economico, como tambe medio ambiental cu a fiha pa opera un refineria na Aruba awendia”, Gobernador Refunjol ta bisa.
