Den comunidad en general for di algun aña pasa ta wordo scucha comentarionan di atraso di permiso den DIMAS pero ultimamente sector Horeca ta bin confrontando problema pa hende por traha, nan no ta haya hendenan local y stranhero tin cu espera periodonan largo pa cu nan permiso.

Dianan pasa, Bon Dia Aruba a publica un articulo tocante permisonan e cual tabatin un par di fout di tipeo na unda cu ta precies pa trece dilanti e informacion corecto un biaha mas.

Marilyn Wout PR di Departamento di Integracion, Maneho, Admision di Stranhero (DIMAS) ayera mainta a realisa un conferencia di prensa pa amplia un poco mas tocante e topico aki y el splica cu nan tin diferente proceso di permisonan andando na unda cu siman pasa nan a ricibi e ultimo version di e buki di maneho cu tambe a wordo publica riba nan website, manera el a sigura.

Tin diferente companianan den sector comercial cu tin e necesidad di haya empleadonan, den esaki Wout a bisa cu esnan cu no a ricibi e curso ainda lo por inscribi via e formulario cu ta disponibel via e facebook page di DIMAS caminda e siguiente training ta bay cuminsa na april.

Den e training aki ta encera kico e maneho nobo ta implica, kico ta e permiso cu personanan por aplica pe, documentonan y tambe con por traha cu e portal, “e portal tin diferente beneficionan tanto pa e persona di recurso humano cu ta introduci e permiso como tambe pa e cliente cu ta esun cu ta e titular di e permiso aki.”

Un peticion di permiso ta cuminsa cana na momento cu un persona ta cumpli cu e pago completo di e permiso, el a sigura cu nan ta hayando retonan pa lo cual ta pago di permiso y cu hopi persona ta keha cu nan permiso “ta pega” pero ora ta bay check riba e sistema di website a resulta cu hopi di nan a paga un parti y no e permiso completo, of nan a haci e pago di otro forma cu no ta esun corecto.

Wout a señala cu si algun persona a cumpli cu e pago por manda e comprobante na e e-mail: betaling@dimasaruba.aw pa asina nan por comproba cu Departamento di Impuesto cu e pago a wordo ricibi y e ora ey e peticion ta sigui cana den e proceso di permiso.

Segun e maneho di admision, Wout a bisa cu nan tin cu bay wak si e compania ta existi, si ta inscribi na KvK, entre otro, pa wak si tur e datonan ta corecto pa asina ey por wordo introduci peticion di permiso.

Na momento cu nan tin tur e datonan, nan ta traha e usuario pa e compania of e titular di e permiso, cu esaki nan ta invita companianan pa haci e training di esaki na unda nan ta tuma 10 participante maximo lo cual ta depende di cuanto demanda e training aki tin pa nan por programa esaki.

Nan tin un cantidad di entre 3.000 pa 4.000 peticion di permiso pa aña den e parti laboral, segun Wout a comenta y ta existi companianan cu ta para garante pa nan empleadonan, pa e motibo aki nan ta pidi na companianan cu tin empleadonan cu nan permiso ta bay caduca na april, mei of juni di e aña aki pa nan inscribi den e curso aki di e website pa por wordo instrui con pa entrega peticion di permiso di un forma corecto.

E tempo cu nan tin pa procesa cada permiso ta entre 6 pa 10 siman, pero si ta haci e peticion usando e website esey ta nifica cu e permiso por bay mas lihe, manera Wout a afirma. Den futuro, e solicitante di permiso of e compania lo por paga e permiso via e portal di pago mes pero nan ta trahando riba esey, no ta na vigor ainda.

Ta diferente factor cu ta hunga den e tardansa di un permiso, Wout a señala cu den e tres luna aki, ya caba tin 3.334 peticion di permiso cu a wordo entrega, di esaki casi 1.000 di nan ta cla y 1.176 peticion ta pendiente di pago “esakinan ta peticion cu a wordo entrega y cu ainda nos no a ricibi e pago of tin peticion cu a wordo paga pero e pago no a wordo registra.”

Den e cambio di maneho, e peticion ta cuminsa cana na momento nan ta ricibi e pago completo debi cu “no ta DIMAS esun cu ta registra e pago, ta Departamento di Impuesto y a nan ta informa di e peticionnan cu a cumpli cu e pago y esey ta wordo hinca den e sistema,” el a declara.

Tambe, den e peticionnan cu nan tin den proceso nan ta depende di otro instancianan como Departamento di Impuesto cu a wordo menciona caba pa asina ey wak si e persona ta cumpli cu e inkomensnorm pa por check si e garante tin por lo menos 2.040 florin pa luna pa e por para como garante pa un peticion di permiso di reunificacion familiar, si ta trata di busca un personal domestico e solicitante mester prueba cu e tin 50.000 florin pa aña.

Ademas el a bisa cu otro instancianan ta envolvi den e proceso aki como Ministerio Publico, Veiligheidsdienst Aruba, entre otro cu nan mester haci nan trabou na ora di un persona aplica pa un prome permiso como check antecedentenan penal di e solicitante di e permiso, esey tambe ta tuma su tempo segun Wout a finalisa.