Ayera mainta a tuma luga e conferencia di prensa di Rotary Club of Aruba durante cual nan a anuncia e di 40 edicion di e evento Fiesta Rotaria 2023. Presidente di Rotary Club of Aruba (RCA), Shelby Maduro, hunto cu Luis Oduber, Chair Fiesta Rotaria RCA, y Kapil Sawilani, Co-Chair Fiesta Rotaria RCA, a elabora ariba e diferente detayenan di e evento.

Maduro a anuncia cu despues di tres aña cu pandemia di COVID-19 a golpia Aruba y a pone stop na tur tipo di actividad, e weekend aki, diadomingo, 2 di april, lo tuma luga e di 40 edicion di Fiesta Rotaria.

Fiesta Rotaria ta e evento di recaudacion di fondo mas grandi di RCA, na unda cu e dia aki tur locual cu RCA bende durante e evento, hunto cu e bendemento di nan popular rifa, tur e placa cu wordo recauda lo bay back 100% pa comunidad.

“Cu e placa aki nos ta yuda diferente fundacionnan den comunidad den e area di muchanan, adultonan mayor, personanan cu desabilidad y hobennan. Cu cada placa y cada rifa cu wordo cumpra, cu tur articulo cu wordo cumpra abo tambe por yuda e comunidad di Aruba,” Maduro a resalta.

El a sigui splica cu e meta cu RCA tin pa e aña aki ta pa logra un suma di mas di 400 mil florin di ganashi pa nan por duna back na comunidad y yuda tur esnan cu tin mester di dje.

Fiesta Rotaria lo tuma luga diadomingo awo 2 di april 2023 for di 10or di mainta te cu 6or di atardi na e parkinglot di Stadion Guillermo Prospero Trinidad.

Luis Oduber, Chair di e organisacion di Fiesta Rotaria di RCA a elabora ariba e diferente actividad- y atraccionnan cu ta bay tin durante e evento aki pa pueblo di Aruba.

Ta bay tin e famoso supermercado na unda cu ta bay tin hopi producto na prijsnan hopi abao pa comunidad. El a menciona cu ta bay tin entre otro juice, refresco, papel sanitario, productonan pa laba paña, bleki di cuminda, cuminda pa bestia y diferente producto di cushina.

Tambe ta bay tin tent di paña, na unda ta bay tin tela, paña di mesa, cusinchi, serbete, y ta bay tin paña y sapato pa hende muhe, hende homber y mucha.

Durante e benta ta bay tin un tent na unda ta bay tin productonan pa hogar y trabou. Segun Oduber a indica, tin un total di nuebe container cu productonan cu ta inclui entre otro cama, matras, boxspring, cashi, stoel, mesa y hopi mas. Ta bay tin tambe verf, schroef, tegels, glas y mas otro producto pa cas. Adicionalmente, lo tin productonan pa computer manera monitor, keyboard y mouse.

 

Manera custumber durante e eventonan di Fiesta Rotaria den añanan anterior, ta bay tin e tent di mata. Aki por haya un variedad grandi di mata di fruta, mas di 80 mata, di frutanan manera mango, sorsaca, mispel, kenepa y mas. Ta bay tin tambe un variedad di matanan pa decoracion pa cas.

RCA ta conoci pa nan famoso Wheel of Fortune (Ruleta di Fortuna) cu no por keda afo, na unda tur hende tin oportunidad pa gana diferente premio.

Rotaract Club of Aruba, partner di Rotary Club Aruba, tambe lo t’ey presente cu un tent na unda ta bay tin diferente cos di come, bebe y cos dushi.

Oduber a agrega cu ta bay tin entretenimento, show di baile, banda musical y DJ pa entretene e publico presente.

Kapil Sawilani, Co-Chair Fiesta Rotaria di RCA, a splica cu parti di tur e actividadnan cu ta bay tin durante e evento, nan ta bay tin e famoso rifa di Fiesta Rotaria mes.

Pa loke ta e premionan, Sawilani a conta cu ta bay tin un total di 14 premio. Prome premio ta un auto Chevrolet Groove; segundo premio ta dos pasashi pa Medellin, Colombia; di tres premio ta un Iphone 13; premio cuater y cinco ta un gift certificate di 1500 florin di Kooyman y Boolchands; premio seis y shete ta gift certificate na balor di 1000 florin di Ling & Sons y AMC Unicon; premio number ocho ta un weekend stay pa dos persona na Divi Resort Aruba y premionan nuebe te cu 14 ta bay ta 500 florin cash.

E rifa lo ta disponibel dia di Fiesta Rotaria mes y e ganadonan di e rifa lo wordo saca na final di e evento. Sawilani a agrega cu e rifa lo wordo saca den presencia di un notario y el a informa tambe cu no ta necesario pa e persona cu gana un premio t’ey presente durante cu nan ta sacando ganadonan pa por ricibi su premio.

“E ta un bon oportunidad pa coopera cu nos, cumpra e rifa pasobra tur e fondonan cu wordo recauda den e evento Youtube den e rifa lo bay 100% back pa comunidad di Aruba,” el a remarca.

Por ultimo, Maduro, Presidente di RCA a informa cu na tur e tentnan ta bay tin mashin di banco pa tur persona cu ta desea di usa nan carchi di banco pa cumpra cualkier cos, hasta na e rifa, por haci esaki libremente.

Rotary Club of Aruba ta invita pa pasa disfruta di e evento Fiesta Rotaria y di e forma aki aporta pa yuda e comunidad di Aruba.