E instancia ta otorga permisonan di estadia y labor, Dimas ta señala un desaroyo preocupante unda clientenan ta entrega documentonan cu ta parce falso of falsifica.

“Den e procesamento di peticionnan pa permiso di trabou y peticionnan pa personal domestico ta tuma nota di algun desaroyo preocupante. Ta ripara cu tin clientenan cu ta entrega den e proceso di aplicacion pa un permiso di estadia documentonan cu ta parce di ta falso of cu ta parce di ta falsifica”, esaki e instancia ta informa den un relato.

Bon Dia Aruba por nota den e relato aki cu Dimas na mesun momento ta divulga cu e tin prome pa controla esaki riba autenticidad. Pero cu nan ta ‘sigui haci controlnan administrativo pa check via di su fuentenan oficial di gobierno, si e comprobantenan entrega, por ehempel comprobantenan di salario y otro declaracion di entrada, ta (of no) na ordo’.

Den e mesun relato e instancia ta informa tambe cu despues di 1 april mester uza e listanan nobo di rekisito general y tambe specifico. Dimas a introduci nan na 1 december 2016 caba pero a aplica un un periodo di transicion di cuatro luna den cual ainda por a haci uzo di e listanan di rekisito bieu. E periodo aki ta termina e siman aki. Un di e cambionan mas importante ta cu e documentonan necesario mester tin un validez rekeri. “Mester tin, si ta trata di un acta oficial, un apostilla of mester legalis’e.

Venezuela
Pa locual ta trata clientenan procedente di Venezuela, Dimas ta bisa cu no ta logra den tur caso pa confirma cu e documento di bon conducta conoci como ‘certificación de antecedentes penales’ ta na ordo. “E ta importante pa nos clientenan mes por subi e website: https://validarlegalizaciones.mppre.gob.ve/ y por wak pa nan si e documento cu nan kier bay entrega ta (of no) uno corecto, valido y original.”

E instancia ta bisa cu nan tambe ta controla e codigo cu ta indica riba e documento. “Dimas ta check si e nomber di e peticionario ta di acuerdo cu e documento y tambe cu su apostille. Ta check pa cual pais e documento ta destina.  Tambe ta check cu su apostille tin un validez di por lo menos seis luna.”

Sin un documento di bon conducta no ta na ordo, Dimas ta enfatisa no lo procede pa duna e permiso. “Esaki ta conta pa tur nacionalidad. Ta recomendabel pa clientenan procedente di otro paisnan tambe controla nan documentonan riba e websitenan corespondiente (si esaki ta e caso).”