Ayera pa 1.45 di merdia, oficina di prensa di Gobierno a comparti un audio y un video, unda minister di Labor, Paul Croes no a papia cu el a renuncia sino cu e lo ta ausente temporalmente y pa un periodo cortico di su funcion como minister.
E declaracion aki di minister Paul Croes no a conta cu presencia di prensa, sino cu el a wordo canalisa door di oficina di prensa di gobierno mes. Pa motibo di esaki Bon Dia Aruba no por a haci pregunta, entre otro pa puntra minister Croes con a para cu su investigacion cu e mester a haci un aña pasa manera acorda den Conseho di Minister. Y por ehempel e nunca a ripara algo straño cu e procedura di permisonan. Y mas importante: si e minister ta culpabel di e acusacionnan haci. Pasobra te awor e minister no a desmenti e acusacion di corupcion.
Un otro pregunta nos kier a haci tabata over di e trahado domestico ilegal cu husticia a haya den su cas.
Sinembargo prensa a haya un video unda ta mustra cu den presencia di prome minister Mike Eman, e mandatario Croes a expresa su decision cu e lo ta ausente di su funcion te ora cu e proceso di investigacion di Ministerio Publico (OM) contra su persona como sospecho di corupcion den dunamento di permiso di trabou, ta wordo aclaria. Igualmente el a laga sa cu minister Angel Bermudez di Finansa lo keda responsabel di su cartera di Labor, asunto Social y di Hubentud te ora cu e investigacion lo bin cla.
Pa periodo corto
Sr. Croes ta bisa cu nan a tuma na serio e investigacion cu autoridadnan hudicial ta bin realisando rond di e caso aki cu ta envolvi su persona. Pa tal motibo e kier duna espacio na OM y autoridadnan pa haci nan trabou den un forma “obhetivo, den un forma diligente y cu tur e prioridadnan cu nan mes a informa cu lo ta haciendo.” E mandatario ta expresa su confiansa den nos sistema hudicial.
Segun minister Croes, considerando e seriedad di e caso aki, el a haci un peticion na Conseho di Minister pa e bay den un periodo di ausencia di su funcion gubernamental. Esaki pa motibo cu e caso na e momento aki no ta dun’e e espacio pa por continua cu e trabou. El a bin cu e decision aki despues di consulta cu algun consehero, famia y coleganan di dje. Ainda oficialmente no ta determina con largo e periodo di ausencia aki lo bay ta, pero si el a bisa cu e lo ta un periodo corto. El a expresa cu e decision aki a keda aproba pa Conseho di Minister tambe.
Minister Croes tabata mustra hopi conmovi a gradici tur hende cu a brinda nan sosten pa e momentonan “dificil cu nos ta atravesando como famia, pero tambe como persona”. Igualmente el a laga sa cu hamas y nunca e por a pensa di confronta un situacion asina den su carera politico.
E mandatario a reenforsa loke ya el a yega di bisa den su prome reaccion, entre nan cu e no lo duna niun declaracion explicito ariba e caso penal cu ta andando contra su persona y algun otro persona di su oficina. E motibo di esaki –segun e mandatario- ta cu nan kier haya prome aclaracion riba e caso. “Te na e momentonan aki nos mes no tin informacion concreto.” Sinembargo, manera Bon Dia Aruba ya a remarca, sr. Croes no a desmenti e acusacionnan te awor.
Di su banda, minister presidente Eman a bisa den e video cu e situacion cu minister Paul Croes y su famia ta pasando aden “ta conmove nos profundamente”. Y el a expresa entre otro expresionnan, palabranan di amistad y solidaridad pa Paul Croes y su famia. Bon Dia Aruba kier a puntra si minister Croes mes a bin cu e proposicion pa pasa su cartera temporalmente na colega Bermudez of e Conseho di Minister a pidi sr. Croes pa haci esaki. Tambe nos kier a pidi dicon sr. Eman como lider di gabinete ta bay acuerdo cu e decision aki y si e no ta opta pa sr. Croes tuma su retiro. Teniendo cuenta tambe cu ta aña di eleccion. Pero manera bisa, gobierno a dicidi di no duna un conferencia di prensa pa asina prensa por a cumpli cu su tarea democratico.
