Mediante un comunicado di Departamento di Infrastructura y Planificacion nan a sigura cu tin hopi reto ainda den departamento cu nan mester atende cune y nan ta trahando riba peticion pa tereno, segun loke nan a informa.
“E Departamento di Infrastructura y Planificacion, DIP a enfrenta y ta enfrentando hopi reto. Esaki debi na e tantisimo investigacionnan den ultimo añanan cu a paralisa hopi proceso. Ademas, tin escasez di personal tambe debi cu ainda tin personal riba schorsing door di e investigacionnan penal. A pesar di e retonan serio aki, DIP ta den proceso pa elimina e atrasonan y pa medio 2024 ya tur hende lo por nota un diferencia.” E comunicado ta señala.
Ademas, nan ta sigura cu un reto cu DIP mester tene cuenta cune ta e preocupacion grandi na Aruba pa cu e capacidad di carga na Aruba, “esaki combina cu e hecho cu tereno ta schaars, ta haci cu DIP ta cauteloso y prudente den su maneho ora ta pidi pa traha condominiums of hotel. Esey den e caso specifico aki ta e causa di atraso. Sinembargo DIP ta trahando pa cumpli cu sentencia di hues teniendo na cuenta e interes general di pais Aruba y interes di tur esnan cu a pidi tereno.”
E comunicado ta indica cu e realidad di casonan den corte tambe ta un desafio pa DIP pa purba minimalisa esakinan mas hopi posibel y trece e decisionnan bek na DIP mes unda nan ta pertenece.
“DIP ta trahando duro riba su eficiencia, integridad y confiansa y no ta un proceso di algun luna pero di añanan cu tin cu drecha (herstel) y ta spera mas movecion den e parti comercial den aña 2024 conforme ley, maneho y reglanan di Pais Aruba.”
For di algun tempo caba, por mira y lesa diferente comentario pa loke ta maneho di e departamento aki, for di diferente ciudadano caminda nan ta sigura cu DIP ta obstaculisando nan pa nan por haya un tereno pa cas of pa construi manera ta e caso di Dr. Hendrick Marsman e cual a sali publica den nos edicion di awe tambe.
Na april 2023, Ministerio Publico a informa cu lo no sigui e investigacion riba iregularidadnan den otorgamento di terenonan. Ministerio Publico a informa cu tabatin falta di prueba pa haci un investigacion penal y cu Ministerio Publico no ta continua cu esun di nan pero si con otro investigacionnan interno.
Ta un hecho conoci cu den ultimo añanan tabata tin hopi iregularidad cu otorgamento di tereno y hues a confirma esey tambe den e veredicto den caso Avestruz. Hopi ciudadano a ser perhudica pa esaki, mirando scarsedad di terenonan na Aruba. Hopi famia no por haya tereno pa construi nan cas y esey a conduci na varios investigacionnan interno, entre otro riba otorgamento di terenonan comercial y di huur, y tambe casnan otorga na Seroe Colorado.
Den e tempo ey, a conclui cu talbes esnan envolvi por a scapa di investigacionnan penal, pero demas investigacionnan a continua.
