Directiva di KVK y minister di transporte ta fortifica lasonan trahando hunto

ORANJESTAD – Recientemente Directiva di Camara di Comercio y Industria di Aruba (KvK) a tene un reunion cu minister Chris Romero, Durante reunion a elabora riba diferente topiconan cu ta impacta comercio.

KvK a yama e reunion aki pa stimula colaboracion entre sector publico y sector priva. E aña aki e topico central ta “Trahando hunto” y e reunion cu Minister ta e prome di otro reunionnan cu KvK tin planea.

Intencion di KvK ta pa por continua traha hunto y comparti idea y pensamento riba desaroyonan y proyectonan cu ta impacta comercio di Aruba en general. KvK ta hopi agradecido cu minister a duna di su tempo y e intencion ta pa por tene reunionnan den forma frecuente y asina ambos banda ta keda bon informa. Minister a apunta un persona di contacto di su banda pa asina mantene un bon comunicacion. Asina aki KvK por bay bek den su seno y informa sector priva di diferente proyectonan y desaroyonan.

Fast ferry
KvK a bin cu un agenda cu diferente topico cu ta toca cartera di minister Romero. Prome punto riba agenda ta e fast ferry. Minister a firma un MOU y ta elaborando riba un roadmap cu lo duna forma na su implementacion na Aruba. A acerca varios stakeholders pa haya mas informacion pa tene cuenta cu tur factornan. E fast ferry lo bay yuda stimula comercio di Aruba y nos region en particular y hermana isla Corsow. KvK a trece su puntonan di atencion dilanti pa realisacion di un fast ferry mirando e impacto cu e ta crea riba transporte, turismo y comercio di nos isla. Pa KvK e ta importante cu un estudio detaya wordo ehecuta riba e impacto riba sectornan existente di transporte y tambe haci debido feasibility study y midi e Return on Investment di gobierno. Gobierno lo presenta un plan total indicando con lo desaroya San Nicolas pa aloca e fast ferry y ta conta cu colaboracion y inversion di sector priva pa su desaroyo.

Agricultura
E desaroyo di e sector di agricultura ta un punto riba agenda cu tambe por mira beneficionan di un fast ferry. Gobierno kier haci agricultura un pilar economico nobo. Gobierno mester trece claridad encuanto kico ta recomenda pa produci localmente cu lo beneficia nos comunidad y cu por wordo exporta. Minister a conta di un proyecto na San Nicolas cu a laga nan impresiona y cu ta expandiendo mas ainda den produccion y distribuicion. Gobierno lo bin cu incentivanan pa stimula mas empresario den sector di agricultura establece un negoshi. Mester bin consistencia den produccion local y expande e conocemento den cultiva na scolnan y cu Santa Rosa. Pa agricultura, un tereno pa por cultiva ta hopi importante. Pa cu esaki KvK a sugeri pa introduci un tipo di erfpacht cu ta wordo otorga solamente pa planta riba dje y no por wordo cambia pa traha un cas, apartamento of cualkier tipo di edificio comercial. Esaki pa garantisa cu tereno pa cultiva ta disponibel y tin garantia den un inversion.

Telecomunicacion
Minister a indica cu e enfoke di Setar ta riba introduccion di un red di 5G cu lo por bira un realidad pa 2020. Actualmente ta haciendo diferente test y analisis riba e infrastructura cu lo carga e red nobo aki. KvK a puntra con lo bay haci uzo di 5G mirando cu e ta un red dedica completamente na “Internet of Things” y pa esaki ta puntra si companianan priva por haci un entrada riba mercado a base di funcion di 5G. KvK kier evita cu ripiti manera a pasa cu otro companianan cu a subi mercado di telecomunicacion pero a bay failliet.

Trahando hunto
E reunion a termina cu un resumen di e topiconan menciona. Pa mustra aprecio na minister Romero a haci entrega di un certificado pa mustra cu tin colaboracion y cu tin e intencion serio pa sigui traha hunto.

You May Also Like

Reconstruccion di Briyo di Solo lo cuminsa januari

Despues cu e candela a kima tres lokaal na pasadia Briyo di Solo algun ...

Legalisa no ta nifica legal pa hoben

ORANJESTAD – Diabierna mainta den un conferencia di prensa conhunto di varios instancia a ...

Resultadonan di Indice di Prijs di Consumo (CPI) pa juli 2017

E CPI pa juli 2017 tabatin un caida di 0.1 porciento, ekivalente na 116.55, ...

Reunion cas di padu lampe (1).jpg

Padu Lampe su obranan mester proteccion como patrimonio cultural no material di Aruba

Recientemente, sr. Juan Chabaya Lampe, cariñosamente conoci como “Padu del Caribe”, co-autor di nos ...

‘Mi no kier un stempel parlament’

Ayera tardi, Juan “Ady” Thijsen a keda eligi como presidente di parlamento. Algo si ...

waf barcadera

Situacion na waf Barcader no ta soluciona ainda

E conflico entre e operado di e waf di Barcadara, Astec, y aduna pa ...