Fundacion Hende Muhe den Dificultad (FHMD) recientemente a scoge un directiva nobo. Despues di mas di 20 aña ta guia e fundacion, Sra. Yvonne Spellen a retira como Presidente y a pasa e funcion over na Sra. Suzette Kock, cu ta miembro di e directiva desde 2015 y cu ta un persona hopi capabel y motiva. Tambe, Sra. Vanessa Quilotte a bolbe den e directiva, despues di algun aña di ausencia, e biaha aki como Secretaria di e fundacion. Alabes un otro ex-miembro tambe a wordo yama bon bini back den e directiva, cual ta Sra. Sigrid Torres. Finalmente Sra. Diana Werleman a tuma despedida como Tesorera y Sra. Marisella Bronswinkel a tuma e funcion aki over.
E directiva nobo di FHMD ta consisti awor di: Sra. Suzette Kock (Presidente), Sra. Yvonne Spellen (Vice Presidente), Sra. Vanessa Quilotte (Secretaria), Sra. Marisella Bronswinkel (Tesorera), Sra. Astrid Muller (Miembro), Sra. Dalila Trinidad-Monte (Miembro) y Sra. Nancy Gravenstijn (Miembro). Tin 1 vacatura. Si algun persona ta interesa pa sostene e fundacion, nan por tuma contacto libremente cu Sra. Suzette Kock (tel: 593-0330). Hende homber tambe ta mas cu bon bini den e directiva!
FHMD kier a haci uzo di e oportunidad aki pa gradici Sra. Yvonne Spellen pa su contribucion enorme y impagabel na e fundacion. Sra. Spellen tabata e motor tras di e fundacion, no solamente e tabata traha di dia y anochi na fabor di hende muhe y mucha) cu ta victima di violencia domestico, pero e tabata tambe haci e trabao di duna informacion y conscientisa hende, y haciendo esey e la adkiri un netwerk grandi cu ta consisti di otro organisacionnan y di gobierno. Te hasta e tabata activo den exterior, pa adkiri y comparti conocemento di e materia cu otro islanan Caribense den Reino, cu kier a tuma ehempel na e shelter di FHMD, cu ta e unico den su sorto den nos region.
Sra. Spellen lo pasa su experticio y su experiencia over na e Presidente nobo, Sra. Kock, cu ta cla pa duna guia na e gran cantidad di proyecto cu FHMD tin ariba agenda pa e aña aki. Alabes tin un cantidad di campañanan di conscientisacion y fundraising riba programa e aña aki, di cual e mas importante ta e ‘Fundraising Luau Event’ di e fundacion, cual lo wordo teni riba 25 juni proximo na Parke Arawa. Carchinan na balor di USD 100 pa pareha ta obtenibel cerca tur miembronan di directiva y tambe na e oficina di FHMD na Primavera 1B. FHMD ta spera di haya e sosten completo di e pueblo Arubano, pa asina e por continua cu su tarea hopi importante di combati Violencia Domestico na Aruba.
