Segun director di Brandweer di Aruba, Edward de Cuba, atencion ta wordo poni pa atende cu e diferente necesidad cu e cuerpo aki. Malcontento cu sindicato SINBA cu ta e sindicato di e trahadonan di departamento di Brandweer a yega di trece dilanti. El a bisa cu hunto cu minister di Husticia, Andin Bikker, nan por a logra pa bin na un palabracion con e resto di aña lo bay wordo hinca den otro.

De Cuba a referi na e anuncio di minister di Husticia tocante dos truck uSa, pero den bon condicion, pa reforsa esunnan existente for di varios aña pasa. E ta haya e anuncio di e trucknan cu ta bin for di Schiphol (Hulanda) ta positivo a base di cooperacion cu aeropuerto di Aruba tin cu nan.

El a bisa cu berdad nan ta trucknan usa, pero mirando e necesidad urgente cu Brandweer Aruba tin, e ta positivo. Pa bay busca un truck nobo for di un fabrica, e ta bay tuma su tempo, entre 12 pa 14 luna. Mientras cu e necesidad ta aworaki. Sinembargo pa medio di e contacto aki, hunto cu ministerio di Husticia, a logra cu Brandweer Aruba a haya specificacionnan di nan trucknan disponibel.

Encuanto cu normalmente e ekiponan cu personal di brandweer ta traha cune ta bin Merca, y awor nan lo bay haya ekipo Europeo, cu personal di brandweer no ta custumbra cune, el a laga sa cu nan a check e asunto aki tambe. Nan no mester di un training special, ya cu ekiponan cu ta bin di Hulanda, ta ekiponan Mericano. Y nan a wordo fabrica na Merca specificamente pa Schiphol. De Cuba a agrega cu nan tin sosten di e fabrica aki tambe den caso cu nan mester sosten den futuro riba e trucknan aki.

Algo importante pa e departamento aki ta cu e trucknan, nan manual di servicio ta mustra cu nan ta unidadnan den bon condicion. Nan comision interno cu ta atende cu e vehiculonan di brandweer a studia e condicionnan y manual di servicio pa duna un conseho na e mandatario riba e miho escogencia pa Brandweer Aruba. E mesun comision aki a haya cu nan ta trucknan cu nos por usa na Aruba. Nan ta cla y den condicion cu unabes na Aruba, nan por drenta den funcion di biaha, segun comandante De Cuba.

Ademas di atende cu e falta di trucknan, De Cuba a declara na Bon Dia Aruba cu nan ta buscando tambe e trucknan no solo pa aeropuerto, sino pa comunidad mes of esunnan conoci como e trucknan cora. E mesun comision ta evalua unidad di bombero cu por subi caya y cu nan por wordo usa di un manera sigur, y cu nos por haci uso di nan pa un periodo largo.

Diferente comision interno ta atendiendo cu asunto di uniform pa nan personal, y tambe riba condicion di nan edificionan, asina director di Brandweer Aruba a bisa. Nan ta comision integra pa e mesun trahadonan bombero mes. Nan ta esun cu ta duna directiva di e cuerpo aki cu ta wordo canalisa cu e minister en cuestion riba cual ta e miho consehonan pa tuma e miho decision. “Pasobra nan como trahadonan ta usuario di e productonan aki,”el a bisa. Pues e ta haya cu nan ta esun cu por duna un miho idea kico nan mester y con mester hacie.

 

LEAVE A REPLY

Please enter your comment!
Please enter your name here