Como un siman pasa director di DTZ a saca un carta den cual ta duna e reglanan pa loke ta uzo di medionan di comunicacion door di partidonan politico durante e temporada for di awo te cu eleccion. Parlamentario Andin Bikker, alabes un abogado cu experticio amplio riba leynan di telecomunicacion, ta kere cu e decretonan cu e director di DTZ ta basa su mes riba nan ta bay en contra di nos constitucion y pues no tin validez.
Den nos constitucion articulo I:22 ta bisa claramente cu ora un ley ta contra nos constitucion manera ta e caso cu e decretonan aki, e mester wordo considera nulo (“onverbindend”) y no e por wordo ehecuta. Segun articulo I:12 den nos constitucion ta poni tambe cu nos no por haci censura, pues no mester pidi permiso prome cu expresa opinionnan, entre otro di indole politico. E articulo aki pues ta un otro base cual ta mustra cu e decretonan uza door di e director di DTZ ta contra nos constitucion. Loke parlamentario Bikker a tuma nota di dje tambe ta cu tin un trato desigual door di DTZ ya cu diripiente tin tur sorto di programa di entrevista a “pop up” cu ta duna espacio na Gobierno y asina pues na un forma sofistica AVP como partido den gobierno ta pretende cu nan no ta bezig cu programanan di indole politico y basicamente ta bypass e mesun decretonan ey cu DTZ kier aplica pa otro partidonan. Ta keda na DTZ y gobierno pa demostra cu e decretonan ta vigente paso asina nos constitucion ta hinca den otro: articulo 1:22 ta bisa cu decretonan contra nos constitucion no por wordo ehecuta y mester wordo considera nulo y articulo 1:12 ta bisa cu no mester permiso di antemano pa expresa bo opinion, pues DTZ y Gobierno no por practica censura. Si mira e dos articulonan aki di nos constitucion parla mentario Bikker no ta compronde di unda e director di DTZ ta saca e decretonan bieu cu e ta uzando.
Pa colmo na aña 2000 Corte Europeo a dicta cu no tin mag pa bin cu tipo di restriccionnan aki riba libertad di expresion. Pues e cuenta pa bin cu leynan bieu cu no tin validez paso ta cumbini gobierno pa otro partidonan no haya exposure, ta algo cu segun e opinion di parlamentario Bikker e radionan no mester perde tempo ni worry cu ne. Ademas e parlamentario ta recorda cu e ultimo 40 añanan e no por corda cu tabatin restriccion pa pasa propagandanan di indole politico na radio den e temporada bayendo pa eleccion.
Pues loke ta pasando awor ta un ridiculez di otro mundo di parti di DTZ y gobierno di AVP pa bay purba enforsa leynan bieu cu ta nulo y sin validez. Ta parce cu nos ta bibando den un tipo di dictadura.
