S.V. RCA. a gana Deportivo Nacional y a pusha pa un di 3 wega

Diasabra anochi a tuma luga e di 2 wega di final di e campeonato 2016-2017 di Division Honor di Arubaanse Voetbal Bond. S.V. RCA a bay cu e victoria riba Deportivo Nacional, un wega cu a termina 6-2. E team di Solito a yega stadion determina pa gana y asina a pusha pa un di 3 wega, cu lo bira tambe e ultimo wega den e sistema di “Best out of 3”. Desde comienso ambos team tabata determina pa gana, ya cu ambos ta bou presion.

Desde trempan e prome dos gol a cay pa asina e wega a empata. Deportivo Nacional a termina cu 2 gol, mientras cu S.V. RCA a bay contento cu e victoria di 6 gol na fabor. Hungadonan cu a anota gol pe anochi aki tabata Cristian Siniestra, Ronald Gomez cu 2 gol, Hugo Robert, Steven Rua y Glenbert Croes. Cu e victoria aki siguiente wega lo tuma luga diamars awo. Presidente di AVB, Ing. Richard Dijkhoff tabata contento cu e resultado di e wega.

Un publico grandi a presenta na stadion pa mira kico lo a pasa durante wega. “Tur hende a biba cu e wega y RCA a bin pa gana, mientras Nacional a bin cu e pensamento pa gana”, Richard Dijkhoff a expresa. Na comienso Nacional tabata domina pero despues e wega a bira pareu ya cu ambos team tabata empata. Pero RCA a busca pa hunga duro y a bay cu e victoria. Director Tecnico di Deportivo Nacional, Dreyer Bracho no tabata contento cu e resultado y ta sinti cu e aliniacion cu nan a bin cu ne no a funciona manera cu nan tabata kier. Henter e team a faya durante e wega y awo nan lo prepara mas duro pe wega final pa asina bay cu e victoria contra S.V. RCA. “Boso lo mira un Nacional diferente di loke nos a hunga. Nos a cay den hopi trampa y nos no a duna di nos manera mester ta.

Durante e siguiente wega nos lo ta completamente otro”, Dreyer Bracho a splica. Coach di SV RCA, Juan Valdez, a remarca cu diamars e hungadonan no por a domina e hugada y Nacional a probecha di e erornan, pero diasabra anochi si S.V. RCA a hunga pa bay cu e victoria. E parti di defensa a bay bon pero no manera cu nan tabata kier pasobra toch 2 gol a cay. Ta invita tur hende pa diamars awor yega stadion trempan pasobra esaki lo ta e wega final. Si e resultado ta empata na di 90 minuut di wega, lo hunga tempo extra na cada banda y si ainda e ta empata, lo bay over na tiramento di pinalti.

Na final di e wega lo tin un campeon cu lo bay cas cu e trofeo di Campeon di liga Division di Honor 2016- 2017. A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.