Awe, riba rednan social a circula un video den e cual por a mira dos persona cu ta saca un caha di morto di un truck y ta pone den un bari di sushi. Imagennan cu a causa conmocion pa algun personanan den comunidad, pero DVG a confirma cu e proceso a bay segun regla di higiena.
Pa e motibo aki, Bon Dia Aruba a tuma contacto cu e compania funerario mes, pa asina por haya e otro banda di e medaya. Anthony Latham, director di Royal Aurora Funeral, a splica e motibo dicon nan ta haci e procedemento di e manera aki.
Lathan a comenta cu ora cu nan ta saca un caha di morto for di un santana, nan ta yama e personanan di Directie Volksgezondheid (DVG). Na momento cu nan no por ta presente, e compania funerario no por mishi cu ni un kelder pa saca ningun difunto.
Den e caso specifico aki, Lathan a menciona cu e trahadonan di e compania a saca e difunto y nan a trece e caha na e compania, acompaña pa DVG desde santana. Na e momento cu e personanan a hiba e difunto pa hink’e den un ‘body bag’ nan a trece caha bashi. “No por tin weso den dje”, el a sigura.
Asina mes, el a destaca: “Esaki ta un proceso normal cu ta tumando añanan largo.” Pero door cu algun persona a graba e momento precies ora e trahadonan di compania funerario tabata hinca e caha di morto den e bari di sushi, esaki a causa conmocion pa algun personanan di e comunidad.
Tambe, Lathan a trece dilanti cu e cahanan di morto mester wordo benta na bari di sushi door cu e compania encarga di recoge sushi tur siman ta hiba e cahanan aki y ta procesa nan. “Y ni un hende ta wak nada”, Lathan a afirma.
Ademas, el a splica cu nan ta saca e morto for di santana ora e famia mester usa e mesun buraco back y nan mester saca e difunto cu tin dera un par di aña caba, pero den e caso aki, e tabatin dera varios aña pero e no tabata cla completo. “Kiermen e no a descompone completo, nan mester coge full e difunto, hink’e den un body bag di plastic y e persona di DVG por a constata cu e curpa a bay den mashin di cremacion. Esey ta meneer su trabou y el a haci’e” Lathan a afirma.
Pa loke ta trata e otro resto, cu ta e caha bashi, el a expresa cu nan a hink’e den bari di sushi manera tur hende por a mira den e video. Di su banda Lathan a trece dilanti cu loke ta pasa ta cu Aruba ta un comunidad chikito y e hende ta busca pa kibra otro.
Lathan tambe a señala cu nan ta haci nan trabou profesionalmente. “Mi no por bay coy un weso of un cabes di hende y bent’e den bari di sushi.”
El a splica cu na otro paisnan, como ehemplo Merca, e comunidad por separa e sushi pero aki na Aruba no tin’e. Akinan tin un caminda unda hende tira tur cos den mesun bari di sushi, tur e negoshinan cu tin carton y plastic ta tir’e den mesun bari y esey ta bay dump.
Esaki a sucede algun añanan pasa, tempo cu e horcan a ranca e dak di misa. Lathan a declara ora nan a coge e cahanan di morto y a benta nan riba dump y e hendenan mes a wak’e. Pero door di esey nan a cuminsa hinca tur e cahanan den e bari di sushi di e compania di desperdicio priva, pa no laga e cahanan exponi riba dump.
Di su banda, DVG a manda un comunicado pa medionan di comunicacion, den cual nan a cuminsa haci un investigacion tocante e proceso aki. Bon Dia Aruba a tuma contacto cu DVG su PR, Jurette Croes, ken a splica cu despues cu e video a bay riba rednan social, nan a busca e informacion necesario y “tur proceso a bay segun regla di higiena y por a constata cu tur cos ta ok”.
Cu e investigacion por a duna como resultado cu “no tabatin ningun resto humano den e caha, y e caha di morto a wordo saca bou tur regla di higiena y lo wordo transporta pa dump pa wordo deshaci”, el a finalisa.
