Director di scol: Casonan di abuso di mucha ta cada aña mas pio y nos no por keda keto mas

4Jul,JO, Mucha (1).jpg

Bon Dia a papia cu un director di scol cu ta prefera di keda anonimo pa motibo cu e ta traha directamente cu e instancianan y tin biaha segun e ta splica,  nan no ta compronde cu ta vocifera na bienestar di e mucha. Segun e persona aki, esaki ta pa protege e muchanan cu e mester sali na vanguardia uzando e unico departamentonan cu tin.

”En principio, den mi trabao mi tin cu eigenlijk sali na defensa di e muchanan, pues ora cu tin algo nos ta entrega keho di biaha. E ta asina cu no tin hopi instancia y e instancianan cu tin actualmente no tin hopi poder tampoco. E experiencia cu ami tin, cada aña e situacion ta bira mas pio” , e director ta conta Bon Dia.

Segun e director ta agrega, cada aña e kehonan ta subi  anto e  personal profesional no ta subi. E instancianan cu ta traha na beneficio di mucha no ta bira mas grandi tampoco. ”Mi ta compronde nan banda cu nan ta mara na ley y mara na  hende pa traha. Pero mi ta kere cu na final di dia ta e muchanan ta esunnan cu ta sali perhudica pasobra mas bo tarda pa duna asistencia, mas pio e situacion ta bay bira” , e persona ta splica Bon Dia.

E director ta agrega cu e tin varios ehempel di casonan cu nan a yega di entrega keho caminda un maltrato menos grave a crece na bira un maltrato hopi mas grandi pa via di a tarda di regla cu e asunto apropiadamente. ”P’esey mi ta haya ta importante pa enfrenta e situacion di biaha pasobra mas bo warda, ta mas pio e caso ta bay bira. Bo ta haya situacionnan tambe caminda porta tin un victima di un persona, e persona no ta wordo gara pasobra e victima no ta papia e ora ey e mesun persona ta bay riba un di dos of di tres victima pasobra e no ta wordo gara anto e ta sigui”, e director ta agrega.

 

E situacion a bira hopi mas pio den e ultimo 10 aña

”Hopi biaha nos ta sconde e realidad cu na Aruba esey no ta pasa. Mester stop di pone un Taboe riba e topico aki anto cuminsa haci algo riba dje. E ta pio cu 10 aña pasa sigur pasobra ami mes ta bay haci un bon tempo den enseñansa anto p’esey mi por compara cu el a bira pio esey ta un echo. Mi ta kere cu semper por cuminsa na haci algo , bo no por spera cu ta bay tin cambio di un dia pa otro pero mester cuminsa move si!” e director ta bisa.
 

 Mester entrega keho, stop di sconde anto cuminsa actua y papia

Ta importante pa stop di sconde pasobra mas bo sconde, menos informacion y data bo tin segun e director ta splica Bon Dia. ”Menos prueba cu e realidad ta asina , ta menos ta wordo haci. Por ehempel,  si gobierno ta haya un cantidad minimo di kehonan, anto e ta bay bisa pakico mi tin cu busca mas hende pa traha den mi instancianan si ta suficiente cu e hendenan cu tin siendo cu no ta asina, pero si no tin cifra bo no por haci nada”  e director ta comenta.

Esaki e ta haya ta importante pa por defende e muchanan. Den su experiencia, e ta conta Bon Dia cu mester por haci keho pa e bala por cuminsa lora anto sea pa berguensa of pasobra ta famia of amigo anto no kier problema cun’e, mester laga e cosnan ey un banda y pensa riba e bienestar di e mucha prome cu tur otro cos. ”Aruba ta un isla asina chikito, tur hende conoce otro anto pa evita problema nos ta prefera di keda keto sin tene na cuenta cu door di keda keto bo ta causando un problema hopi mas grandi”

You May Also Like

Grupo di persona a presenta na Dimas awe mainta pa pidi status di refugiado

Ya for di oranan di trempan awe mainta, un grupo di persona a aglomera ...

5P3A9663.jpg

Damnan a logra yena cu awa

E horcan Matthew a laga tog basta awa cay riba nos isla, y por ...

Minister Oduber y RDA a firma MOU pa haya tereno cu no ta den uzo bek

ORANJESTAD –Minister Otmar Oduber y RDA a firma un Memorandum of Understandding (MOU) pa ...

Departamento di Aduana ta lansa website nobo

Departamento di Aduana ta launch su website nobo www.douane.aw den compania di Minister di ...

2Juni, JO, Pedro1.JPG

Pedro Wilson: Ora cu Marlonchi tabata riba caya ningun hende no a worry

Pedro Wilson, boluntario pa asistencia di adiccion na Aruba, tabata traha cu gobierno pa ...

Otro victima fatal di violencia domestico

Diamars durante oranan di mainta pa mas o menos 10or di mainta alarma central ...