Dialuna den oranan di atardi, minister di Infrastructura, Desaroyo Teritorial y Medio Ambiente, Marisol Lopez-Tromp a ofrece un conferencia di prensa extraordinario hunto cu director di Serlimar, Anko Koopman pa trece dilanti e situacion den cual compania Serlimar ta aden na e momentonan aki.

Minister Lopez-Tromp a splica cu siman pasa na Serlimar a tuma luga un walk-out y a base di esaki, el a afirma cu no tin un conflicto laboral, mientras cu sindicato a laga sa cu ta existi un conflicto laboral.
Loke realmente a sucede, ta cu un dia prome tabatin un reunion caminda cu esunnan cu ta representantenan di Seppa a sinta cu directiva di Serlimar, miembronan di Raad van Toezich y esunnan cu tin di haci directamente cu e compania, mientras Lopez-Tromp tabata ausente. Pero esey no ta nifica cu e no a haya informacion di e situacion di Serlimar.

Asina mes el, a sigui splica cu despues cu un bonus a sali di hues pa Serlimar cu a bay pa un surseance van betaling – unda cu debi na su situacion financiero e compania a pidi esey y hues a haya suficientemente urgente pa otorga esaki den algun dianan di tempo – esey ta mustra e situacion financiero cu e compania ta aden. Y awor a haya un periodo pa por reorganisa y recupera su mes pa por rescata e compania di e situacion den cual a hay’e aden.

“Tur loke ta e situacion di e compania aki ta wordo revisa pa trata di rescata un compania cu nos a haya den un situacion sumamente dificil”, Lopez-Tromp a sigura.

Di su parti, Anko Koopmans, director di Serlimar a relata cu na momento cu el a yega na direccion di e compania na luna di maart, el a haya un situacion hopi precario. Desde e momento ey, nan a cuminsa di purba di baha tur gasto. Tambe tin hopi punto cu nan ta wak con nan por scapa cen pa por tin un manera di sobrevivi.

Koopmans a bisa cu ta existi hende cu ta menciona cu e tin liñanan cu cierto comerciantenan. El a sigura cu e ta un hende cu a sali for di DTI: “Mi no tin lasonan cu companianan akinan na Aruba y mi ta haciendo tur mi best pa mi logra scapa e compania aki den su temporada hopi dificil”, Koopmans a manifesta.

Di loke ta trata e dudanan cu e trahadonan tin den e maneho di Serlimar, Koopmans a comenta cu e ta kere cu nan tur ta den e preocupacion di kico lo bay pasa, y a puntra Gobierno e parti di e 6.5 miyon florin cu e compania no a ricibi ainda y cu e compania no a haya oido.

Tambe a menciona cu Serlimar como compania ta depende di e hendenan, cu tampoco no kier paga. Ta hopi dificil pa por genera e placa pa por traha un budget balansa, cu solamente tin perdida y no ganashi. Esey ta e motibo pa cual a puntra pa surseance, ya cu nan ta haya un tiki mas espacio pa den un par di aña por yega na un plan cu por haci Serlimar miho.

Ademas, Koopmans e menciona cu e combersacion entre Gobierno y bewindvoerder ta cuminsa den un par di dia y cu e ta espera cu esey lo resulta den un contribucion di placa di gobierno. “Esey ta nos unico lifeline aworaki, y si esey no pasa, mi ta kere cu nos no ta ni sobrevivi e luna di juli”, el a sigura.

Asina mes a sigura cu Serlimar nunca lo tabata un luga stabiel, semper tabatin hopi debe y aworaki e momentonan t’ey cu e placa no ta yega mas. Y si nan no por paga nan debenan, e compania no tin existencia mas. Tambe a expresa cu e trahadonan ta mas preocupa na e momentonan aki pa motibo cu e tambe ta un hende cu ta papia cu nan, cu nan ta den un situacion hopi precario.

Di loke ta trata e debe cu Serlimar tin cu algun companianan priva y Gobierno, Koopmans a trece dilanti cu esey tin hopi detaye. E problema di e debenan ta cu tin di nan cu por ta fiar of no, esey ta algo cu e compania tin cu dicidi riba dje. Pero e parti di e debitornan grandi, actualmente nan ta bezig pa cuminsa cobra persona- y companianan.

Di e debe di gobierno, Koopmans a sigura cu esey ta un negociacion cu aworaki mester cuminsa y e ta espera cu aki un par di dia nan por haya un tiki cen pa nan por sobrevivi e periodo te cu e hues duna veredicto, cu ta dia 26 di augustus; y cu nan tin chens pa bay den e definitivo surseance pa por cuminsa traha riba e parti di debe y gobierno tambe tin su responsabilidad.

Aworaki Serlimar tin un entrada di aproximadamente dos miyon y e tin un debe di tres miyon, sikiera un miyon cada luna cu ta pasa over como debe. Asina nan tabata opera y nan tabata duna kico ta e prioridad. Koopmans a bisa cu esey aworaki a para y loke nan a cuminsa haci ta cu e placa cu nan tin, nan mester paga nan gastonan actual.

Pa finalisa, Lopez-Tromp a expresa cu tocante e ley di Serlimar, ta falta e parti di un ‘financial scan’ cu ya nan tin caba, un director cu nan tambe tin cu Koopmans awor, un business plan cu awor ta trahando riba dje y cu mester cuminsa for di abou. Na momento cu a topa cu e situacion financiero cu segun un rapport Serlimar tin 40 miyon di deficit, ta un situacion cu ora ta bay parlamento mester tin un plan riba kico lo haci pa Serlimar pa futuro.

 

 

 

LEAVE A REPLY

Please enter your comment!
Please enter your name here