Ayera tardi riba rednan social, Gobernador di Aruba, Su Excelencia Alfonso Boekhoudt a comparti su discurso di Aña Nobo, dirigi na Parlamento, vice-presidente di Raad van State, y demas invitadonan durante su recepcion di Aña Nobo, cu a tuma lugar dia 6 di januari ultimo.
“Awo ta dia 6 di januari 2026, y e aña ta apenas algun dia bieu. Di otro banda, e aña a cuminsa, pa casi tur di boso, manera tur aña nobo ta cuminsa: door di brasa of sunchi bo sernan keri of miembronan di famia y deseando nan tur sorto di cos bon. Mi lo bay back na esaki den un rato.
“Pero e aña tambe a cuminsa den un manera hopi diferente. Cu accion militar na nos frontera sur, den capital di Venezuela. Diripiente, e menasa di violencia militar – cual su acumulacion ya tabata sinti pa un tempo caba – a bira concreto y visible. Maske nos no por evalua ainda e consecuencianan a largo plaso di e accion Mericano na Venezuela, loke a sucede ta laga cla cu algo den nos region a cambia. Nos ta spera cu e situacion no escala, cu e partidonan involucra atene na ley internacional, y cu un regreso di democracia na Venezuela por cuminsa.
“Pa Aruba, e situacion ta cu nos, igual cu resto di Reino Hulandes, no ta parti di e conflicto na Venezuela. Pa e motibo aki no tin cuestion di un menasa dirigi na Aruba. Tambe nos sa cu nos ta protegi pa e forsanan arma Hulandes; minister di Defensa tabata ainda na Aruba ayera, loke ta un señal importante. Na mes momento, e eventonan aki tambe ta indica cu nos na Aruba mester sigui traha riba planificacion pa crisis, y cu nos mester cooperacion den esaki cu partnernan den e otro partinan Caribense di Reino y na Hulanda. Stapnan importante ta siendo tuma den e area aki.
“Mi ta bay back awo na e deseonan cu nos ta extende na otro tiki despues cu holoshi dal 12or riba bispo di Aña Nobo. Loke nos ta desea otro na momentonan asina ta abstracto; nan ta generalisacionnan: miho deseo, un aña nobo prospero, felicidad y exito. Pero laga nos purba haci esaki mas concreto: kico realmente – concretamente – nos ta desea pa otro como ser humano, como residente di Aruba?
“Salud, na prome lugar. Un bida social feliz y rico, cu famia y amigo, tambe ta importante. Seguridad y un ambiente saludable pa biba? Un bon trabao of un negoshi cu ta funciona bon cu ta sigura un entrada sostenible? Suficiente oportunidad pa nos muchanan den educacion y den nan carera? En realidad, nos kier tur esaki – pa nos mes y pa otronan.
“Mas nos articula y specifica nos deseonan, mas cla ta bira cu nos no tin tur cos den nos propio man ora ta trata di haci nan realidad. Pa logra bon salud, no ta suficiente pa mantene un dieta saludable y suficiente actividad fisico; nos mester tambe por depende riba un cadena di cuido di salud cu ta traha bon – un cu tin personal adecuado y finanzas adecuado.
“Un bida social feliz? Esaki ta en parti den nos propio control, pero tambe ta rekeri facilidadnan den sociedad pa hende cu mester asistencia: adulto mayor, hende cu discapacidad fisico, of por ehempel hende cu tin soledad.
“Un bon trabao y entrada sostenible? Den e sentido aki, Aruba ta – casi manera niun otro parti na mundo – depende riba un solo sector: turismo. Un sector cu a trece crecemento y prosperidad na Aruba, pero cu na mesun momento ta extremadamente vulnerable pa shock externo y desaroyo geopolitico, y di cual, pa motibo di crecemento desenfrena den decadanan recien, nos tambe a experimenta cada bes mas su desbentahanan.
“Un ambiente safe pa biba? Mi a menciona caba desaroyonan geopolitico cu por causa inkietud den nos alrededor inmediato.
“Y mi a menciona educacion y prospecto di carera nos hobennan. Mas cu e otro ehempelnan, esaki ta ilustra cu no semper nos tin nos felicidad y bienestar completamente den nos propio man: nos ta depende riba otro actor cu ta crea e marco pa nos felicidad y prosperidad. Den educacion, nos mester suficiente maestro cu por duna educacion di calidad halto, usando metodo moderno, den un ambiente di aprendisahe apropia, asina preparando nos muchanan pa un mundo y mercado laboral cambiante.
“Mi ta bay ta cla cu boso: nos por desea otro hopi cos, pero pa por realisa e deseonan ay, nos ta trata cu dependencianan. Nos ta depende riba otro, pero na un grado significante tambe riba gobierno. Un gobierno cu ta pone prioridad y marco pa crea condicionnan dentro di cual e ciudadanonan di Aruba por desaroya y florece.
“Un gobierno cu ta establece regulacion unda ta necesario y un gobierno cu ta haci escogencianan bon considera cu ta crea espacio financiero pa inverti y diseña programanan social. Y – sigur mesun importante – un gobierno cu tambe ta splica pakico tin biaha tin cosnan cu no por haci. Pasobra esey tambe ta parti di bida: nos por desea otro tur sorto di cos den cambio di aña, pero tur hende akinan lo sa di experiencia personal cu transicionnan di aña anterior cu no tur cos ta bay ser realisa.
“Esaki ta nifica cu gobierno ta bay tin cu haci escogencia, y cu esey tambe ta nifica splica kico un escogencia ta nifica – hasta si esaki ta involucra duna un mensahe menos placentero. Mi ta bay duna boso algun ehempel aleatorio:
“Nos tur kier mas atencion y fondo pa cuido di adulto mayor, pero inversion adicional den un sector logicamente ta nifica cu tin menos recurso disponible pa otro areanan di prioridad. Esey ta rekeri escogencia di gobierno y splicacion.
“Of den ramo di mercado laboral: Aruba tin necesidad urgente pa trahadornan adicional, pero kico un aumento den forsa laboral ta nifica pa e disponibilidad di vivienda pagable of pa infrastructura?
“Nos tur tin nos idea y deseo tocante e sorto di asunto aki. Tambe nos ta desea pa un gobierno cu ta haci e escogencianan corecto y ta splica e rasonamento tras di e decisionnan ey. Loke ta importante ta cu ta tene cuenta cu e interes di Aruba a largo plaso.
“No por resolve tur asunto compleho dentro di un solo aña (of dentro di un termino di cuatro aña di gobienro); mas tempo ta necesario pa esey. Tempo pa investigacion y preparacion, tempo pa consulta cu partnernan social y organisacionnan di sociedad civil, y tempo pa prepara regulacion y implementacion. Gobernacion ta tuma tempo; e ta rekeri un bista den horizonte y perseverancia.
“Manera nos ta desea otro e mesun cosnan cada aña tiki despues di mey anochi den oranan trempan di 1 di januari, asina tambe nos deseo tocante nos gobierno ta keda esencialmente igual tur aña: scoge e prioridadnan corecto, splica claramente kico no por ser haci, goberna cu e meta a largo plaso den mente, y sigura sosten amplio di sociedad pa toma di decision.
“Mi ta kere cu nos ta un stap chikito mas cerca caba di realisa nos deseonan ora nos ta expresa nan y comparti nan cu otro. Laga nos haci esaki atrobe e aña aki: no solo cu nos sernan keri, pero tambe cu gobierno y sociedad completo. Semper cu e meta di mehora e bida y bienestar di nos sernan keri y di henter sociedad Arubiano.
Mi a sinti e transicion for di e aña bieu na e aña nobo mas fuerte e aña aki, como un tempo di cambio. Momento di alegria y momento di despedida tabata cerca di otro. Experiencianan asina no ta desanima nos, sino mas bien ta reforsa e sentido di responsabilidad cu tin riba e cargo cu mi tin e privilegio di tin, y di e balornan cu ta sostene nos sistema constitucional. Cu e consciencia aki, mi ta mira dilanti na e aña nobo – cu gratitud, cu confiansa, y cu dedicacion pa sirbi nos pais y comunidad.
“Awo mi lo kier hisa mi glas cu boso y desea boso y boso sernan keri, tambe den nomber di mi esposa Hanneke, un hopi feliz Aña Nobo.”
