Djego Real, hunto cu Izaline Calister, kier motiva e diaspora antiano biba riba nos islanan y na Hulanda, pa saca man y yuda su prohimo, den un momento di Yelele! E cantica infeccioso ta papia di e alegria y satisfaccion cu trabao boluntario por dunado. Cu Yelele, e proyecto ‘Samen Ouder Worden’ ke corda nos cu nos bario mester di nos, y ke motiva bo pa captura bo momento di accion – aptamente yama e momento Yelele.
Yelele a keda produci y skibi pa Riëndy ‘Ray Bass aka Djego Real’ Holder y Izaline Calister, y e videoclip a keda dirigi pa Pathos Studios.
Bira grandi ta un privilegio cu nos tur lo ke experencia. Lamentablemente, hopi di nos grandi nan ta cayendo den isolacion paso nan no tin acceso na e recursonan social disponibel. E grandi nan aki ta sufri den silencio, specialmente esunnan biba na Hulanda. Pesei fundacion NOV – Nederlandse Organisaties Vrijwilligerswerk – a tuma e iniciativa pa promove e conexion entre generacionnan pa medio di trabao boluntario unda e necesidad di e grandi ta para central. E iniciativa di NOV a formalisa den e proyecto ‘Samen Ouder Worden’, y ta activo na cuarenta luga na Hulanda hunto cu su 11 partnernan strategico. Den Haag ta keda guia pa Curasoleño Shari van den Hout cu e enfoke riba nos grandi nan Antiano y Caribense.
E momentu ‘Yelele’
E reto ta pa determina con pa motiva e hoben Antiano pa haci trabao boluntario y pa motiva e grandi pa comparti su sabiduria y conocemento ku e generacion binidero. Cu e cantica ‘Yelele’ e grito pa accion a keda publica cu un campaña cu ta activo entre 15 pa 30 di november. Djego y Izaline kier motiva nos comunidad pa captura nan propio momento “Yelele’, pero mirando e restriccion di COVID -19, nos mester cuida specialmente nos grandi nan y pesey ta opta pa haci un grito di accion mas modera. P’esei nan ta invita un y tur pa uza nan telefon y graba 1 minuut di e miho interpretacion di e cantica ‘Yelele’ y ‘tag’ e Facebook/YeleleNederland y pone e ‘hashtag #Yelele y #Yelelemoment. Lo scoge e miho interpretacion di “Yelele’, unda lo saca dos ganado cu por gana varios premio atractivo. Tur clip lo keda comparti riba e paginanan di Yelele riba Facebook y Instagram. Lo saca e ganado durante e prome siman di december.
Activa den bo bario
Si bo ke informacion con pa ehecuta trabao boluntario den bo bario, bishita e website di www.samenouderworden.nl pa mas informacion y manda un whatsapp pa e team di Den Haag –Yurani y Shari – na +31-619788541. Sigui Ray Bass na www.instagram.com/mrraybass y Djego: www.instagram.com/djegotami Por sigui Izaline Calister riba su instagram.com/izalinecalisterofficial.
