Eco (3).JPG

Director di Departamento di Naturalesa & Medio ambiente (DNM) Gisbert Boekhoudt ta bisa cu un instalacion di kima sushi ta trece un diferente tipo di polucion cual ta dañino anto nan no tin ekiponan pa midi esaki na Aruba.

 

Den nos editorial di diasabra ultimo, a toca riba e tema di maneho di desperdicio y e situacion na Parkietenbos cu tin basta tempo bayendo atras. Gobierno a bin cu un solucion alternativo invertiendo 17 miyon florin pa pone e pipanan pa e compania Eco Gas cuminsa un proyecto nobo pa converti sushi den gas. Anto manera a wordo menciona den nos editorial, nos ta yegando luna di november y ainda no tin ningun noticia di e proyecto di gas cu tin basta tempo para eynan.

Bon Dia Aruba a bay Eco Gas anto acudi cerca un empleado cu a bisa cu “no tabata tin hende na e momento nan ey pa atende cu prensa” y te ainda no a logra comunica cu Eco Gas pa un entrevista. E instalacion aki di kima sushi ta un instalacion industrial cual ta ubica den un zona industrial.

 

Sinembargo, segun director Boekhoudt, DNM ta na haltura cu tin mas compania eynan sin laga afo cu tin hende cu ta biba den cercania di e operacion aki di cual e ta splica cu: “Esey ta e parti pa e ordenanza teritorial cu no ta cay aden pero na unda tin dos diferente funcion cu no ta bay cu otro; pues algo industrial den cercania di residencia.”

Esaki pues ta precisamente un di e puntonan di discusion cu ainda e compania Eco Gas no a elabora riba dje como tambe con e proyecto ta bayendo anto si e ta produciendo resultadonan positivo.

 

Kimamento di sushi

Una bes bo kima, e gasnan ta bay den laira anto esaki tin su efecto. Mas completo e kimamento ta, menos polucion bo tin anto e gasnan cu bo ta genera ta depende na kico bo ta kima. Con largo e candela ta keda y e temperatura di dje, si e ta bao presion si of no, tambe ta diferente factornan cu ta percura pa e kimamento bay mas bon y completo. Pa e gasnan cu ta sali for di e pipanan por ehempel, tin un aparato cu bo por instala den dje pa filter y purifica e aire cual ta yuda. Mas largo e pipa ta den haltura, mas leu e efectonan di e gasnan ta bay. Sushi en general ta algo hopi mixto cu tin diferente cosnan aden pues ta conoci segun DNM cu net e gasnan aki tin diferente substancianan cu ta dañino.

 

No ta conoci si e compania a logra di haya un manera pa separa e sushi of si e gas ta djis wordo produci cu tur cos den otro. Sr. Boekhoudt ta bisa: “Tin cierto cosnan cu bo por haci tecnicamente pa alivia e situacion, pero e otro ta pa percura pa no tin hende cu ta biba eynan cu ta haya molester di e gasnan cu ta wordo emiti.”

 

No tin ekipo pa midi e gas

Segun DNM, e ta conoci cu un instalacion di kima sushi ta genera un diferente tipo di polucion pero e midimento mester wordo tuma pa por determina kico nan ta y ki concentracion. DNM no tin ekiponan pa por haci e tipo di trabao aki anto lo mester busca hende for di exterior pa por haci e. “E hendenan cu a studia den ramo di medio ambiente por haci e trabao aki. Si nos ta bay haci e standarisa manera den pasado cu nos tabata tin intencion pa haci e pa e rafinaderia, e ora bo ta instala ekipo di monitor pa haci e standarisa. Pero si bo haci no structural, ta mas miho pa bo cumpra e servicio na luga di tin e ekiponan permanente aden. E gastonan y e inversion ta diferente.”

 

Trahando mas sero di sushi?

Bon Dia Aruba a tuma nota di algun ceronan di sushi cu tin patras di e edificio. E ceronan aki ta mustra di ta stapel di mas tanto glas, boter, metal y algun otro materialnan. No ta conoci si esaki ta un tipo di metodo di separacion di sushi ni tampoco kico ta bay haci cu e sushi aki; si ta bay transporta esaki otro caminda, dera esaki bao di tera of si nan ta kim’e tambe.

 

Keho

E holo di e gas aki ta basta fuerte anto bo por hole esaki for di un distancia. E ta un holo similar cu esun di gas di un stoof. Bon Dia Aruba no por a confirma tampoco cuanto bes pa dia e sushi ta wordo kima pero actualmente e holo fuerte di e gas ta wordo sinti tur dia y bo por hole esaki ora cu bo pasa riba e caminda dilanti di Eco Gas.

 

Riba rednan social tin varios hende cu a cuminsa keha di e holo, como tambe empleadonan di otro companianan cu ta traha den e area. Un di nan ta un chauffeur di truck cu ta bisa Bon Dia Aruba cu e ta haya molester di e holo aki tur dia awo anto e ta preocupa cu esaki. DNM ta comenta cu: “Nos a bay eynan na diferente ocasion den pasado. Nos ta sigui bay cerca nan anto check con e instalacion y testnan a bay.”

 

Aunke cu DNM ta e autoridad di medio ambiente na Aruba, nan ta indica cu nan ta hopi limita y nan brasa no ta yega mesun leu cu por ehempel EPA (Environmental Protection Agency) na Merca pa por haci algo si cosnan mester bay for di man. “Nos no a haya ningun kehonan cerca nos anto esey ta haci e dificil. Mas cortico e liña ta entre esun cu tin informacion cu esun cu ta ricibi informacion, mas miho. Pero mi ta haya jammer cu e ta bay via media paso asina e informacion ta perdi anto nos no tin contacto. P’esey si tin algo cu no ta bon, kehonan mester wordo haci direct cerca nos.”