Dolfijn ‘tuijmelaars’ den Canal Ingles tin un ‘cocktail toxico’ di kimico, algun di cual ta prohibi pa varios decada y por ta causando daño na e salud di e mamiferonan marino, cientificonan a bisa diahuebs.

Cientificonan Belga y Frances ta bisa cu nan a detecta acumulacion halto di likido industrial y mercurio den e cuero y vet di e dolfijnnan den e Golfo Normanno-Breton, fuera di e costa nort west di Francia.

Skirbiendo den e journal Scientific Reports, e investigadonan a bisa cu a midi nivelnan di contaminantenan similar na esunnan haya den dolfijn den lama Mediteraneo, rond di Everglades na Florida, fuera di e costa di Guyanas, y den Guanbara Bay na Brazil.

Hopi di e kimiconan, incluyendo e asina yama PCBs, ta prohibi desde añanan 1970-80, pero ta persistente den ambiente, unda nan ta pasa a traves di e cadena alimenticio. Pasobra e componentenan por disolve den azeta, nan ta acumula den tejidonan vet. Den mamiferonan marino, mamanan por pasa e kimiconan na nan cria durante embaraso y lactancia.

“Nos ta sospecha e concentracion eleva di PCBs por altera e reproduccion di mamifero marino, conduciendo na reduccion den e cantidad di cria cu ta nace, afectando e renobacion di e poblacion”, segun Krishna Das, un profesor asocia na Universidad di Liege, Belgica.

PCBs, cual tabata popular como likido lubricante y hydraulico, por interumpi receptornan di hormoon y afecta sistema inmune, segun Das, co- autor di e estudio.

Frank Mattig, un ornitologo na Universidad di Oldenburg, Alemania, kende no a participa den e estudio, a bisa cu e hallazgo ta echo locual cientificonan a descubri den otro especienan marino. Mattig, kende ta studia impacto di PCBs y mercurio riba parhanan marino, a bisa cu depredadornan top manera dolfijn y bayena ta particularmente suceptibel pa acumula nivelnan halto di toxina. No ta cla ki nivel di e kimiconan ta peligroso, pero otro estudionan a demostra cu ta presenta un riesgo pa salud den concentracionnan halto, el a bisa. “Tin un bon motibo pa cual nan a wordo prohibi.”

E investigadonan a pidi pa mas esfuerso pa elimina e kimiconan peligroso, incluyendo disposicion sigur di stock y ekipo, reduciendo lek for di landfill, y haciendo estuario y riunan yena cu PCB limpi.

 

LEAVE A REPLY

Please enter your comment!
Please enter your name here