Lider di fraccion di AVP den Parlamento Marlon Sneek: Maestronan disgusta exigiendo pa Minister Lampe baha!

Lamentabel, esey ta e prome palabranan di Lider di Fraccion di AVP, Marlon Sneek. For di luna di juni a cuminsa manda peticion pa reunion publico den Parlamento p’asina e Minister encarga cu Enseñansa, Rudy Lampe, presenta y duna oportunidad pa hiba un debate riba kico ta tumando luga den ramo di Enseñansa.

Problemanan escalando tur dia, mas recien un contract di ‘no work no pay’ a keda presenta na e trahadonan di OAA, contradiciendo asina ey e siguransa di garantia di trabou. Si acaso bira malo na pia di trabou bo ta keda sin pago e dianan cu bo ta ausente. Esaki, segun Sneek, ta loke nan a tende.

El a bisa cu practicamente tur hende tin problema cu e Minister aki, entre nan Traimerdia, SPO, MDC y asina ey por keda menciona ken y kico tur ta e disgustonan tumando luga. “A constata cu e Fraccion di MEP, esun mas grandi cu ta sostene e Gobierno aki no ta duna oido, al contrario ta hunga den nan wega y ta keda pidi bijeenkomst na luga di reunion publico. Esaki no ta aceptabel,” Sneek a bisa.

Sneek ta para riba cu como Parlamentario tin cu tuma responsabilidad y bisa unda nan ta para. Un reunion publico ta di sumo importancia awo aki, ya cu eynan ta caminda por entrega un mocion, por entrega e direccion cu kier mira pa bay y esaki ta instrumento cu como Parlamentario tin pa uza na e momento aki. Den reunion publico ta caminda a entrega mocion indicando na e minister cu no kier independisa ningun departamento di enseñansa, no obstante e decision den Parlamento e Minister a bira bay y cuminsa independisa, MDC un di nan. Mientras Parlamento no ta para tras di e idea ey, esunnan cu ta sostene e Gobierno no ta frena esaki y no ta bis’e cu locual e ta haciendo ta bay contra di locual a keda acorda. Ta un señal cu mester manda pa e mandatario cu ta te akinan a yega cune.

Sneek ta keda sorprendi cu cada biaha ta keda aplasa e reunion publico y no ta tuma responsabilidad y pidi e reunion publico p’asina porfin tende unda e minister y cada parlamentario ta para pa cu e maestronan.

Mientrastanto gritonan di maestronan ta bin di tur banda pa e Minister baha awo. Esaki ta algo cu ta bibando basta tempo caba, for di problematica cu Traimerdia en adelante y esaki a keda escala. No tin confiansa mas den e Minister aki, e Parlamentario di AVP a bisa.