No ta un secreto cu den mas di un caso, studiantenan cu ta caba nan estudio di vocacion profesional ta drenta e mercado laboral y ta experiencia un cambio duro pa motibo cu nan no ta na nivel di e trabou of di e deseonan di compania. Den e doorlichting rapport di enseñansa, e grupo di trabou ta duna recomendacion amplio con por sigura un miho conexion entre educacion y e mercado laboral.
E formacion adecua di e studiantenan no solamente ta subraya e talento y e desaroyo personal, pero e ta crucial tambe pa un bon exposicion y expresion di educacion den e mercado laboral. E conclusion cu e rapport ta remarca ta cu e falta di suficiente personal adecua pa e mercado laboral di Aruba ta motibo di preocupacion pa varios aña.
Pa optimalisa e conexion, e grupo di trabou a traha un formula di cuater sub-recomendacion dirigi na: 1. mehora e vision di desaroyo di e mercado laboral y e ahuste cu e oferta educativo; 2. introduci e structura di puntuacion revisa; 3. establece un sistema den cual e empresenan ta reconoci como empresanan di formacion y e supervisornan di formacion profesional ta capacita y certifica; 4. introduci consulta structural entre representantenan di e veld profesional y e institucion di formacion profesional.
Den sectornan unda tin un demanda halto di trahado, entre otro catering, construccion, turismo y den futuro sector di salud, no ta posibel contrata empleado adecua di educacion vocacional. E conexion di educacion cu e necesidadnan di e mercado laboral di Aruba ta un problema pa hopi aña caba. Y ademas e conexion a deteriora drasticamente debi na e desaparicion di e scolnan vocacional.
E dunadonan di trabou ta señala cu tin un conocemento insuficiente di e practica profesional real, habilidadnan practico y social insuficiente, y un actitud no corecto di parti di e graduadonan di educacion vocacional.
E rapport ta enfatisa cu esaki ta haci e pregunta actual: e studiantenan ta siñando e cosnan corecto y a wordo capacita pa obtene un puntacion final corecto?
Den e ultimo añanan, tabatin hopi iniciativa pa mehora e conexion entre educacion y e mercado laboral, te aworaki sin hopi exito. E ultimo iniciativa grandi, segun ta menciona den e rapport, a tuma luga di 2015/2016 ora cu CINOP a supervisa e introduccion aleatorio di e structura di cualificacion profesional (beroepskwalificatie structuur, BKS).
Nan a organisa diferente tayer y mesa rondo den cual e comunidad empresarial tabata bon representa. Algun aña despues, ta parce cu esaki no a duna resultado den mehoracion structural. Por lo tanto e dunadonan di trabou y representantenan di e dunadonan di trabou cu a wordo entrevista pa e grupo di trabou durante e investigacion aki, inicialmente a indica cu nan no tabata motiva pa coopera den propuestanan nobo pa mehora e conexion cu educacion.
E prome sub-recomendacion cu a grupo di trabou a duna den e rapport pa e punto aki ta mehoracion di e vision di e desaroyo di e mercado laboral y e ahuste cu e oferta educativo. Pa esaki, nan ta splica, prome mester determina si e educacion vocacional ta ofrece e cursonan adecua pa e futuro necesidadnan y esnan actual di e mercado laboral.
Un factor cu nan a subraya ta cu aki na Aruba no tin un agencia cu ta explora y a base di esey duna conseho na Gobierno di Aruba pa e reconocemento di formacionnan profesional nobo.
Mester proporciona formacion profesional di acuerdo cu e structura di cualificacion revisa y aumenta e cantidad di stage pa e studiantenan.
Otro factor evidente den e falta di conexion entre educacion y e mercado laboral ta e hecho cu e introduccion di e structura di cualificacion revisa a wordo asumi solamente na 2021 pa DEA, EPB y EPI cu e apoyo di CINOP.
E revision aki ta concentra ariba e enseñansa di habilidadnan practico cu ta refleha e practica profesional actual den un ambiente practico simula of durante e stage den e practica profesional real.
E rapport ta enfatisa cu tur e partidonan ta na fabor di e introduccion lihe di e structura di cualificacion revisa y nan ta spera cu esaki mehora e adaptacion entre e formacion profesional y e mercado laboral.
E directiva di educacion vocacional ta culpa e retraso aki na e falta di regulacion y financiamento pa e transicion aki. E prome opcionnan politico pa esaki a wordo realisa pa e institucionnan, pero e departamentonan ainda no a cuminsa cu e preparativonan pa e concepto educativo nobo.
“Nos a wak poco actividad educativo den e formacion profesional den cual ta simula e practica real. Ademas di esaki, e cantidad di pasantia stage ta limita,” e grupo di trabou a indica.
Nan ta señala cu por logra un miho preparacion pa e practica profesional real haciendo un miho uso di e practicanan pa e obhetivonan di enseñansa specifico di e expediente di cualificacion corespondiente. Aunke e studiantenan aworaki tin dos periodo extendi pa formacion practico, e control ariba kico e studiantenan ta siña exactamente por ta mas fuerte.
Nan ta duna como ehempel cu no tin testnan sistematico pa comproba cual obhetivonan di enseñansa e studiante por domina na e empresa en cuestion. Ademas no semper e studiante tin un supervisor practico profesional y e supervisornan aki no ta capacita ni certifica. Esaki no ta ofrece suficiente garantia pa e efecto di enseñansa durante e stage, como tambe pa e evaluacion di esaki.
E grupo di trabou ta remarca cu e introduccion di un programa educativo coherente cu ta orienta ariba e practica profesional real ta esencial pa un bon combinacion entre educacion y e mercado laboral. Pa logra un calidad den educacion, e examen y formacion practico cu ta cumpli cu e deseonan di e veld profesional, ta necesario un dialogo sustantivo permanente entre e comunidad empresarial y e veld di enseñansa.
Den e dialogo aki por evalua den ki medida e competencia- y actitudnan di e studiantenan di formacion profesional ta den harmonia cu e practica profesional real. E balans ta wordo elabora anualmente y e programanan educativo ta wordo actualisa a base di e evaluacionnan aki.
