(AP) — Ayera a aresta dos homber acusa di yuda establece un warda di polis secreto na New York City den nomber di gobierno Chines, y como tres decena di agente di forsa policial nacional Chines a keda acusa di usa rednan social pa acosa disidentenan dentro di Merca, segun autoridadnan a bisa ayera.
E casonan, tuma hunto, ta parti di un serie di procesamento di Departamento di Husticia den añanan recien cu meta pa interumpi esfuersonan di gobierno Chines pa ubica na Merca activistanan pro-democracia y otronan cu ta abiertamente critico di politicanan di Beijing y suprimi nan libertad di expresion.
Un di e tres caso anuncia ayera ta trata di un frankisia local di e Ministerio Chines di Seguridad Publico cu a opera dentro di un edificio di oficina na bario Chinatown na Manhattan prome cu a cera herfst ultimo memey di un investigacion di FBI. E dos homber aresta tabata actua bao direccion y control di un oficial di gobierno Chines y a delete comunicacion cu e oficial en cuestion for di nan celular despues di haya sa di e investigacion di FBI, segun Departamento di Husticia Mericano.
E hombernan, identifica como “Harry” Lu Jianwang, 61, di Bronx, y Chen Jinping, 59, di Manhattan, ambos ciudadano Mericano, a keda aresta na nan cas dialuna mainta.
Abogado Deirdre Vondornum, representando Lu, a nenga di duna comentario. A laga un mensahe pidiendo comentario for di abogado di Chen.
Na ningun momento e hombernan a registra cu Departamento di Husticia como agentenan di un gobierno stranhero, segun agentenan di ley Mericano. Y maske e warda di polis secreto si a duna algun servicio basico, manera yuda ciudadano Chines renoba nan rijbewijs, tambe tabatin cumpli un funcion mas “siniestro”, incluyendo yuda gobierno Chines ubica activistanan pro-democracia di descendencia Chines bibando na California, segun oficialnan a bisa.
Den añanan recien, oficialnan di Departamento di Husticia Mericano a duna prioridad na acusacionnan pa loke ta conoci como “represion transnacional” den cual gobiernonan stranhero ta traha pa identifica, intimida y silencia disidentenan na Merca.
