Dos casonan separa a tuma luga unda autoridadnan a haya e habitantenan morto den nan cas. E curpanan tabata den mal estado. Ambos ta trata di anciano bibando nan so. Nan a muri den forma natural.
E curpa di un señora (97) di fam Carter a wordo haya ayera sin bida den su cas na St. Maartenstraat (San Nicolas). Bisiñanan a notifica polis. Polis a haya e señora benta riba vloer den su camber y e curpa tabata den un mal estado. Dokter a constata cu el a fayece di un forma natural. Dos miembro di famia a presenta. Uno a indica cu e no kier nada di haber cu e deramento y e otro a indica cu e no por a keda pa motibo cu su casa ta malo. Asina e bisiña B. cu sa haci compras pa e señora Carter ta indica na polis cu e lo zorg pa e deramento. Algun simannan pasa polis tambe mester a drenta den un cas pa un caso similar.
E otro caso ta trata di un señora di 70 aña bibando na Dominicanessestraat. Un homber a bay bishita su tanta na cas mainta, pero no haya contesta. El a bin bek merdia pero nada. E homber a dicidi di bin bek anochi y a grit’e pero ainda no a haya niun reaccion. Esaki a pone cu e homber a dicidi di yama polis pa wak kico por a pasa cu su tanta. Tabata poco dificil pa polis drenta paden y a kibra algun glas pa drenta. Nan no por a drenta e camber debi cu e curpa tabata benta abou y blokia pa habri e porta. Cu ayudo di brandweer a logra drenta paden. Ta mustra cu e señora lo tabatin mas cu 2 dia morto den e cas.
