Hende di partido oficialista y di oposicion a midi nan forsa cu diferente marcha riba caya na Caracas, y otro ciudad di Venezuela. E mobilisacion tabata den un ambiente di tension y bao custodia di militarnan. E situacion aki lo ta menasa di haci e crisis actual na Venezuela mas grave ainda.

Olivia Lozano, diputado di oposicion den asamblea nacional a denuncia cu un persona a ser asesina durante e marcha di oposicion, cu tabata tumando lugar na San Bernardino, Caracas. Lozano a bisa cu un colectivo chavista a ataca manifestante di oposicion y nan a lansa bom lacrimogeno.

E hoben a ser identifica como Carlos Jose Moreno di 19 aña, cu a yega na hospital cu signo vital ainda, unda el a permanece conecta na respiracion artificial pa varios ora te cu el a muri. E hoben a haya un tiro di arma di candela cu a pasa den su cabez.

Un grupo di hende cara tapa y cu arma di candela a ataca y lansa bom lacrimogeno riba tur hende presente den e mobilisacion.

Disturbio a cuminsa na sectornan hopi strategico manera autopista Francisco Fajardo, na El Paraiso, Quinta Crespo, San Bernardino y San Martin na oeste di Caracas, periodistanan a splica.

E sucedido a tuma lugar a pesar cu fiscal general di Venezuela, Luis Ortega Diaz a publica un comunicado diaranson mainta, caminda e tabata haci un yamado na autoridad pa respeta e derecho di protesta pacifico.

Mi ta haci un yamado na tur persona cu a invita pa marcha… e manifestacion no por pone na peligrp e bida di persona cu ta participa den marcha y tampoco di otro persona y menos por pone na peligro stabilidad di institucion na Venezuela”, fiscal general a splica.

Un grupo di hoben tabata kibra acera pa asina por tuma e pidanan di concret pa usa como arma den e mobilisacion, mientras otro di nan tabata kima sushi cu tabatin riba caya. Hopi persona tabata protesta cu weya den varios cas tambe.

Den oranan di atardi tambe a haya sa di un mucha muhe cu a fayece na estado Tachira, y cu tabata participando den marcha di oposicion. E mucha muhe, Paola Ramirez Gomez, di 23 aña, a haya un tiro tambe. Segun informacion e suceso a tuma lugar na Plaza San Carlos na San Cristobal, estado Tachira.

Diamars departamento di estado di Merca a presenta un declaracion tocante e situacion na Venezuela, den cual tabata haci yamado na autoridad di Venezuela pa detene e violencia y a exigi pa duna cuenta tocante tur protesta na Venezuela.