Jesus David Medina Garcia, un musico di San Cristobal, estado Tachira cu a actua na Aruba den varios Symphony Festival, a ricibi 2 Grammy na e premiacion di Latin Grammys 2020 siman pasa. Pa esunnan cu no ta corda Jesus David, 3 aña pasa Jesus David a impresiona tur presente cu su extremidad musical tocando 7 diferente instrument musical den un presentacion abordo di e crucero Freewinds hunto cu Maria Gabriela Rodriguez y German Marcano. Ken por lubida con Jesus David a lidera e grupo di musico di Aruba Symphony Festival den e evento Flash Mob na Superfoods Plaza na 2016.
Pa e album “TERRA” di e artista Spaño Daniel Minimalia cu a ser nomina den e categoria“Best Instrumental MusicAlbum 2020”,Jesús David a ricibi su Grammy como violinista, areglista y dirigent di e grupo di cuerde,hunto cu e famoso Raniero, director di Venezuela Strings Recording Ensemble (VSRE).
Den e grupo di cuerde cu Jesus David a dirigi, un di e violinistanan tabata ningun otro cu Daniela Perez, e hoben violinista cu a gana e competencia entre e studiantenan di Symphony Festival 2018naedad di apenas 13 aña y a toca solo den un concierto na Ritz Carltone sigui entre aña.
Jesus David a wordo premia cu un otro Grammy e mes anochi atrobe como areglista y violinista pa su participacion den e album “Soldados” di e cantante Alex Campos nomina den e categoria “Best Christian MusicAlbum- Spanish Language”.
Jesus David awor ta conta cu 4 Latin Grammy ya cu na 2016 y 2017 el a gana Grammy. E gobernacion di e estado Tachira tambe a reconoce e logronan di Jesus David y a condecor’e den e “Orden de las Artes Culturales ‘Marco Antonio Rivera Useche”’.
Directiva di Aruba Symphony Festival ta manda un pabien grandi na Jesus David Medina pa su logronan y na Daniela Perez pa su participacion den un actividad cu a cosecha un premio hopi codicia. Nos ta spera di mira nan na e Aruba Symphony Festival 2021 atrobe.
Den un concerto abordi di Freewinds cu Maria Gabriela Rodriguez y German Marcano 2016, Jesus David a toca 7 diferente instrument musical.
Daniela Perez di apenas 15 aña a toca den e grupo di cuerde cu a gana un Grammy 2020
