Dos variante mas contagioso di e virus ta circulando na Aruba

Departamento di Salud Publico mediante un publicacion a informa cu un variante nobo di e virus di SARS-CoV-2 ta ssucedede na momento cu e virus ta transmiti su mes asina hopi a traves di hende cu e ta cambia su structura, of ta wordo bisa cu e ta haci mutacion.

Esaki ta un proceso normal cu ta sucede cu tur virus y bacteria, den otro palabra nan ta adapta nan mes.

Den caso di e virus SARS-CoV-2 cu ta causa COVID-19 no ta diferente, debi na e pandemia mundial masha hopi hende a keda contagia caba y ainda ta sigui wordo contagia.

Esaki ta haci cu e virus ta cambiando continuamente den diferente region di mundo, tin di e mutacionnan den e virus cu ta insignificante pero tin di e mutacionnan cu ta causa preocupacion entre cientificonan y esakinan ta wordo categorisa como VOC cu ta un ‘variant of concern’ esaki ta pa motibo cu compara cu e variante di Wuhan China sea e variante nobo ta mas contagioso, mas peligroso of ta afecta no solamente adulto pero tambe mucha.

Na Aruba na e momento aki ta circula dos ‘variant of concern’ cu ta e variante di Reino Uni y tambe e variante di Brazil, e dos variante aki segun expertonan ta mas contagioso cu e variante original di Wuhan y esun di Brazil ta mas peligroso tambe.

Esaki ta haci cu den ciudadnan y poblacionnan unda un gran mayoria di persona ainda no tin resistencia contra e virus por sigui experencia brote di e malesa cu grado di fayecimento cu ta sigui crece.

Si ta para keto y haci un resumen di isla Aruba, por resumi cu e prevalencia pa cu e virus na e momentonan aki ta unicamente 6.5% di e poblacion, esaki ta nifica cu e mayoria di e comunidad ainda ta vulnerable pa e virus aki.

Departamento di Salud Publico ta recomenda comunidad pa sigui cumpli cu tur e medidanan y reglanan vigente, cu presencia di e dos variantenan nobo aki, hopi lihe Aruba por experencia un of mas brote atrobe di casonan di COVID-19.

Esaki ta e motibo pakico ta urgi na comunidad pa sigui cumpli cu tur regla y medida di proteccion. Esunnan den isolacion y cuarentena tambe tin cu sigui cumpli debidamente y cuida su mes y otronan. Di mesun manera nan ta sigura cu ta hopi importante pa comunidad por vacuna, mas lihe y asina menos hende lo bira malo di Covid -19 y mas lihe Aruba ta recupera, DVG lo sigui monitor e situacion cu e variantenan hopi di cerca.