DOW a ofrece un conferencia di prensa ayera mainta pa informa comunidad tocante e trabaonan cu nan lo cuminsa haci di asfalt y drecha caminda na Kamerlingh Onnesstraat bay direccion Tanki Leenderd.
Director di DOW Marlon Croes a señala cu nan ta bay drecha e riolering cu a wordo buta conhuntamente cu FCCA pa nan drecha e sleuven cu tin verzakking y despues di esey nan ta bay asfalta tur e caminda desde e punto di Solito na unda e schakelstation grandi di Elmar ta y bin te cu na skina di stadion RCA.
Ademas, el a menciona cu e punto di skina di stadion RCA crusando cu Hubadastraat tin un punto cu un crusada cu ta peligroso y cu dia pa dia ta wordo experiencia diferente dalmento di auto riba e punto aki, pa esey nan a dicidi di cera y converti e punto aki den un rotonde, mesun cos cu esun cu ta ubica na banda di santana di Paradera unda cu por regula e trafico miho y brinda mas siguridad pa e trafico tambe.
E trabaonan aki lo tuma luga pa dos siman entrante otro siman dialuna 31 di mei y lo dura te cu dia 11 di juni, segun loke Croes a sigura.
Pa por haci e trabao aki y asina bay mas lihe nan a dicidi di cera e caminda 24/7 pa trafico y nan a traha un ruta alternativo na unda ora e persona ta coy e caminda di Kamerlingh Onnesstraat pa bay direccion di rotonde di Tanki Leenderd na haltura di skina di Edisonstraat unda tin un establecimento cu ta bende ijscream e persona lo tin cu lora na man drechi y despues lora den man robes na e caminda cu nan a asfalta algun tempo y borchinan lo indica e caminda te e salida den direccion di Solito pa bay Tanki Leenderd.
Den caminda viceversa e lo pasa den bario residencial manera Croes a sigura, loke ta bay rekeri comprension di e automobilistanan pero tambe di e habitantenan pa e dos siman di trabao.
E inversion pa e trabao aki conhuntamente cu FCCA tin un costo di 130.000 AWG, na unda nan lo drecha full e caminda ey cu tabata presenta un molestia pa chauffeurnan pa via cu e tabata den mal estado.
