DOW: Lo tuma 4 ora maximo pa inundacion di caya seca bek

Durante un conferencia di prensa Departamento DOW a informa cu proyectonan Green Corridor y Watty Vos Boulevard ta yegando fasenan final di ehecucion. Tambe a comenta riba e cayanan cu a keda bou awa despues di un awasero inespera durante fin di siman ultimo. Segun e diseño di e proyecto, cayanan na Green Corridor tin cu keda seco despues di 4 ora cu awasero stop.

Director di DOW Marlon Croes ta splica cu ‘despues di awasero cu a bin como sorpresa diadomingo pasa, algun preocupacion di parti di comunidad en particular pa proyecto Green Corridor a keda na laira. Pero tanto anos di DOW como e contratista encarga cu e proyecto a keda cu mesun preocupacion’.

Pa lidia cu e situacion unda cayanan a keda inunda, e contratistanan Caribbean Infrastructure Company (CIC) y tambe Odinsa a presenta na e sitio di e proyecto pa purba analisa con e cayanan a wordo inunda y tambe evalua e sistema di drenahe cu a wordo diseña, segun sr. Croes.

Nos ekipo di DOW tambe a bay riba field despues cu awa a stop di yobe pa evalua hunto cu CIC y Odinsa e sistema di drenahe y kico lo mester wordo haci pa asina garantisa e fluho di awa den e area.”

Sr. Croes a splica cu den proximo simannan lo tuma luga trabounan intensivo pa por maneha e plan di accion y ehecuta esaki hunto cu Odinsa pa e problema aki no bira uno structural. Sinembargo sr. Croes a menciona cu mientras e awasero ta cay, specialmente si e cay hopi duro, e camindanan lo yena cu awa naturalmente. Pero e intencion segun e director ta cu despues cu awasero stop, dentro di 4 ora maximo e caminda lo mester ta seco bek pa asina e caminda por opera manera normal bek.

Cambio clima ta trece retonan nobo
Pa loke ta trata proyecto Watty Vos Boulevard, Mota Engil, e contratista encarga cu ehecucion di e proyecto aki a informa DOW cu nan tin un consehero na Hulanda cu ta haciendo simulacionnan di Aruba su awasero pa asina recomenda con y kico tin cu wordo haci pa percura cu awasero no stroba e infrastructura y e bario.

E director a admiti cu na e rotonde dilanti ex Codemsa tanto como na altura di Kooyman, unda cu algun santo di construccion a subi caminda a keda afecta pa e awacero fuerte. Mi kier agrega tambe cu e fenomeno aki no ta e prome ni di ultimo. Nos tin cambio di clima tumando luga na Aruba tanto como na nivel mundial unda nos ta mira yobida mas fuerte y mas cortico.”

Esaki ta influencia e infrastructura cu tin na costa den diferente districto pa deshaci di e awasero cu cay . E consecuencianan cu e cambionan di clima aki lo tin pa e infrastructura na costa segun sr. Croes ta cu lo mester bin inversionnan grandi pa crea facilidadnan pa percura cu e awa bay lama durante yobida.

Cambio di filosofia pa crea mas damnan
Sinembargo si mester implementa e cambionan drastico aki, esaki no lo sigura cu e no tin inundacion di caya. “Na Miami por ehempel nan a traha facilidadnan grandi bou di caretera, di tamaño di truck pa handle cu awa. Pero ora nan a haya awasero pisa inesperadamente, e facilidad hunto cu e caya tabata ful bou awa.”

Den Aruba su situacion sr. Croes kier enfatisa cu inversionnan grandi den proyectonan similar no ta bal la pena. “Bo tin cu considera kico ta pisa mas, si bo ta acepta un inundacion temporario of bo ta haci un inversion grandi pa algo cu kisas lo haci su trabou menos cu 4 bes pa aña.”

Pues sr. Croes a conclui cu actualmente DOW kier keda cu e infrastructura tal manera e ta, pero claro purbando pa mehora esaki pa asina percura cu tin menos problemanan cu awacero cu ta posibel. Nos ta trahando riba un masterplan nobo di hemelwatervoer. Nos ta combersando cu Directie Natuur en Milieu (DNM) y tambe Santa Rosa (DLVV) pa identifica damnan cu por wordo aumenta den capacidad y rooinan cu por crea mas dam den nan.”

Esaki ta un filosofia nobo cu e departamento kier bin cu ne, mirando cu segun sr. Croes antes e idea tabata pa deshaci di awasero mas pronto cu ta posibel pa e por yega lama. “Riba termino largo e strategia aki no ta bon pasobra bo awa bou tera (grondwater) ta bira di calidad inferior. Esaki ta afecta tambe bo flora y fauna.”

You May Also Like

‘No por stroba un mucha di ta mucha’

Siman pasa Bon Dia Aruba a haci publicacion di un investigacion cu nos ta ...

Ley structura salarial di maestronan lo tin impacto financiero y riba maneho

Ley di restructuracion salarial di maestronan ta uno cu apesar cu e ta bin ...

IMG_0793.JPG

Caso di maltrato a termina cu detencion pariba di Community pool

Diasabra anochi patruya di San Nicolas a presenta na Otaheitistraat altura di Community Pool ...

carnaval grandi.jpg

SMAC: KPA no por a cumpli pa cambia ora di parada diadomingo

KPA no kier a cambia e orario di parada na Playa diadomingo, cu a ...

reunion casino fta.jpg

FTA nan punto di salida ta pago di salario y garantia di trabou

Fei siman pasa y ayera tambe nan  ta reuniendo cu e grupo interesa pa ...