Dialuna otro siman, dia 27 di maart ta bay cuminsa trabaonan di drenahe di awanan na Palm Beach na unda cu ora awaseronan ta cay riba caminda dilanti stacion di gasolin Citgo ta stroba e trafico y eynan DOW ta bay haci algun trabao pa por tene e caminda aki accesibel.

Esaki ta trece cune cu e trabao ta bay encera diferente fase, e prome di nan ta pa mehora e fluho di trafico den e caminda aki caminda nan lo renoba e asfalt for di stacion di gasolin Citgo te cu Botica Santa Anna, esaki ta bay wordo parti den 3 segmento: e prome segmento ta cobamento pa pone tuberia, basha cement y tambe conecta e drenahe nobo ariba e back profile cu tin na Palma Real, den e di dos segmento nan ta bay kita e capa di asfalt di e caminda via Botica San Anna.

E trabaonan aki di e segmento dos ta bay tuma luga for di 11or di anochi pa 7or di mainta, pa cuater dia largo manera director di DOW Marlon Croes a sigura y den dia e trafico por haci uso di e caretera. E segmento number tres ta pa asfalta e caminda completo cu ta bay tarda un anochi na unda nan lo cera e trafico di 9or te cu 12or di merdia di e siguiente dia.

Di loke ta trata e fase number dos, esey ta encera amplia e capacidad di ‘duiker’ na e muraya di e crusada di e Tanki Real ubica patras di ex-Palm Beach supermarket y di tres fase tambe ta bay amplia e capacidad di duiker na Keito unda cu ora e awa prome cu drenta na e saliña dilanti hotelnan, e tin cu pasa bao dos caminda cu ta bay wordo amplia pa fluho di awa lo pasa mas miho y di cuater fase ta den area di Palm Beach 94B cu nan lo profila e caminda di nobo pa asina e awa su fluho por bay den direccion di saliña parti pa nort.

Ta bay tin cambio den direccion di trafico durante e periodo aki, ora nan ta bay cuminsa traha e prome fase nan ta bay pasa e trafico na e crusada di CMB bay panort y lo bira patras di stacion di gasolin di Palm Beach.

Croes tambe a bisa cu durante e fase dos nan ta bay haci e trabaonan den oranan di anochi loke ta trece cune cu lo tin menos influencia riba fluho di trafico den dia.

E trabaonan aki ta bay dura 30 dia habil pa e prome fase di e duiker, loke ta encera cu nan ta bay tin e caminda ey cera pa seis siman pa asina por pone tur tuberia, betonwerk, haci conexionnan cu ta e trabao mas grandi y despues trabao di asfaltamento cu lo tuma luga pa cuater dia.

Nan a pidi na comunidad cu ta haci uso di e caminda di Palm Beach pa tene na cuenta cu e trabaonan y e molester cu ta bay tin den periodo aki pa loke Croes a bisa pa tene comprension pa cu esaki.

Esaki ta un proyecto cu segun Croes a menciona nan a identifik’e hopi tempo pasa y nan a haci diferente trabao den e parti patras di e stacion di gasolin pa drecha e area pero “ainda nos tin e conexion pa haci pa hib’e den e saliña y nos tin cu aumenta e capacidad di e duiker di pone tuberianan nobo, basicamente pasobra e awa cu ta pasa den e duiker systeem ta asina hopi cu no ta laga awa nobo drenta den dje y consecuentemente e ta sigui subi.”

E trabao aki manera Croes a sigura lo mester duna alivio na unda e stacion di gasolin ta cu e awa no lo keda para mas pa tempo largo.

LEAVE A REPLY

Please enter your comment!
Please enter your name here