Dr. Busari: “No tin duda cu e programa aki ta traha y nos trabao aworaki ta con nos por provee algo a largo plaso cu por mantene”

Na 2021 Dr. Jamui Busari, medico pediatra, hunto cu su ekipo di profesionalnan a lansa e programa Jump 18. Un programa cu ta enfoca den brinda ayudo den diferente area na mucha, y nan mayornan, cu ta sufri di sobrepeso y obesidad. Despues di tres edicion exitoso, Jump 18 ta preparando pa cuminsa otro edicion den luna di september. Dr. Busari ta conta Bon Dia con e proceso di escogencia di participante ta, con e inscripcion ta bayendo y kico ta e plan pa sigui yuda e muchanan aki a largo plaso.

Jump 18 ta un programa cu ta dura seis luna y ta diseña alrededor di educacion, actividad fisico, conseho nutricional y nan monitor tur e actividadnan aki. Durante e programam e muchanan tin e guia y motivacion pa cumpli cu e metanan, pero despues di e programa esaki por cambio. Dr. Busari ta splica cu loke nan a haci te cu aworaki pa participantenan di e programanan anterior di JUMP 18 ta ofece nan caminatanan ‘hikes’ regularmente cu nan por participa.

Ademas nan tin accesibilidad pa bay back na e ekipo di Jump 18 pa conseho. El a indica cu hopi di nan ta ser supervisa ainda pa nutricionistanan di e programa y aworaki nan ta den proceso pa colabora cu e Healthy Lifestyle Center pa wak con nan por diseña un programa di follow up a largo plaso.

Segun Dr. Busari a señala, nan tin un plan caba di follow up a largo plaso pa tur muchanan cu ta participa den Jump 18 y nan ta den combersacion cu e persona encarga cu e Healthy Lifestyle Center y Minister di Salud cu ta pushando pa e programa di estilo di bida saludable entre e muchanan pa wak con por incorpora e follow up a largo plaso.

“Loke nos ta spera den e proximo lunanan ta pa wak un programa completo di un aña y mei na unda cu nos tin seis luna di intervencion y despues un aña di follow up. Nos ta den proceso aworaki teniendo e combersacionnan pa wak con nos por diseña, implementa y maneha esaki,” Dr. Busari a indica.

Pa loke ta e costo di e programa, el a remarca cu pa participantenan Jump 18 no tin ningun costo, pero e programa ta rekeri di financiamento pa por opera. El a sigui splica cu ora el a cuminsa cu Jump 18 no tabatin placa pe y el a bay busca sponsor pa sigura e fondonan pa por opera e programa. E costo pa cada edicion, Dr. Busari a resalta, ta entre 50 y 60 mil florin pa un edicion di seis luna cu 18 participante.

Aña pasa Gobierno di Aruba a incorpora Jump 18 den nan programa pa estilo di bida saludable na Aruba pa mucha y nan a ofrece financiamento adicional pa expande e programa di 18 mucha pa 36 mucha mirando e exito di e programa den e tres edicionnan anterior.

E aña aki na september Jumo 18 ta cuminsa cu un edicion nobo y Dr. Busari ta spera cu e aña aki Gobierno di Aruba ta provee e financiamento pa por maneha esaki y por supuesto cu e apoyo di nan sponsornan.

Dr. Busari a enfatisa cu tur persona cu ta traha pa haci Jump 18 un realidad ta haci esaki boluntariamente y aunke nan ta haci e trabao boluntariamente, e programa ta compensa nan pa e tempo cu nan ta inverti den Jump 18.

“E ta un compensacion y no salario. Mi ta kere ta importante pa comunidad sa cu tur persona cu ta traha den e programa a scoge pa esaki for di e bondad di nan curason y cu e creencia cu nos mester haci e cambio aki un realidad hunto,” el a resalta.

Den september e siguiente edicion di 36 participante ta cuminsa y pa loke ta e inscirpcion Dr. Busari ta indica cu aworaki nan ta den un situacion cu nan ta purbando di mantene trankil pasobra ya caba, prome cu a habri inscripcion, ya caba tin 32 mucha cu a registra pa e siguiente edicion.

Esaki ta debi na e exito di e programa, cu ta inlcui diferente factor. Dr. Busari a splica cu e midimento di exito di e programa no ta perdemento di peso, pero e ta autoestima. El a indica cu hopi mucha cu a paricipa den Jump 18 a cambia, nan a cumisna kere den nan mes, hopi di nan tabata isola, pero nan haci amigonan nobo, nan a mehora nan bida social y tambe mayornan a siña perspectivanan nobo.

El a conta cu si mira back na algun di e grabacion- testimonionan di e muchanan cu a participa y mayornan cu ta pasa den e experiencia, ta icreible loke e programa aki a haci posible. “E educacion cu e muchanan a haya ariba djis cambionan chikito ariba loke nan tabata come, esey tabata increible,” el a bisa.

Un factor importante tambe ta cu e midimento cu nan a haci tabatin cambionan consistente den e BMI, e relacion entre peso, haltura, edad y genero di un mucha. El a sigui splica cu nan a wak cu e muchanan aki a reduci nan BMI, nan a perde peso, den e periodo di seis luna, nan stamina a mehora, nan por a cana distanicanan mas largo y nan resistencia durante actividad fisico tambe a mehora.

“Si bo wak tur cos, nan satisfaccion a mehora, loke nan a siña, nan autoestima, e educacion cu e mayornan a ricibi, e conexionnan social cu e muchanan a haci y tambe midimento completo di cambio entre e tres gruponan di 18 mucha cu nos a realisa ultimo, e cambionan ta igual, no tin duda cu e programa aki ta traha y nos trabao aworaki ta con nos por provee algo a largo plaso cu por mantene,” el a subraya.

E meta, Dr. Busari ta indica, ta pa replica e formula cu nan ta usa durante e intervencion pa realisa un follow a largo plaso pa sigura cu nan por yuda e muchanan mantene e estilo di bida saludable cu nan a siña di dje durante e seis lunanan di intervencion di e programa.

E proceso di inscricpion ta inlcui difernete stap. Dr. Busari ta splica cu ora cu mayornan aplica pa nan yiu participa den Jump 18 tin un proceso di screening pa asina sigura cu e muchanan ta cumpli cu e criteria pa aprticipacion.

Tambe nan ta test pa motivacion, un di e exitonan di e programa. El a resalta cu tin desafionan den bida ta un cos, pero ta motiva pa kier cambia ta otro cos y pesey motivacion ta hopi importante.

Pa esnan cu no ta cumpli cu e cirteria Jump 18 tin un lista di espera pasobra nan a descrubi cu durante e programam, pa difernete motibo, algun mucha ta cay afo y asina e muchanan cu ta den e lista di espera por participa.

El a agrega cu nan a tuma nota tambe, algo cu ta unico di nos pograma, cu durante e proceso di seis luna, algun famia no por a cumpli cu e condicionnan di e programa y enbes di djis pusha nan afo, nan ta duna nan e oportunidad pa participa den e siguiente edicion, pasobra e muchanan no ta responsable cu pa difernete motibo e myornan no por cumpli cu tur e condicionnan.

Por ultimo, Dr. Busari ta enfatisa cu ta impoirtante pa nota cu Jump 18 no ta e unico organisacion na e isla cu ta ofrece ayudo. “Jump 18 ta parti di tur e intervencionnan cu tin disponibel na e isla y nos a demostra kico nos a haci y kico nos resultado ta. Pa cualkier mayor cu ta pensa cu nan yiu mester di apoyo of cu nan mes mester di apoyo, nan ta bon bini pa join Jump 18,” el a finalisa.