Fundacion Pa Nos Muchanan: Mainta Informativo Plan di Desaroyo Profesional pa Centronan di Cuido di Mucha

Recientemente, Fundacion Pa Nos Muchanan (FPNM) a presenta su Plan di Desaroyo Profesional pa Centronan di cuido di mucha (CdCdM). E presentacion a sosode durante un mainta informativo pa cabesantenan di e 116 CdCdM registra na FPNM.

Minister di Asuntonan Social y Husticia, Sr. Rocco Tjon, a haci e apertura oficial, sigi pa Presidente y Directora di FPNM. Den transcurso di e mainta a sigi presentacionnan di diferente oradornan cu a duna un presentacion di e contenido di nan training. A finalisa e mainta cu splicacion di e aspecto logistico di e programa, presenta pa consulente pedagogico di FPNM, sigi pa posibilidad pa esnan presente inscribi digital.

Na aña 2022 FPNM a inicia desaroyo di su Plan di desaroyo Profesional pa CdCdM, entre otro, como parti di E Plan Strategico di FPNM y alaves riba peticion di Ministerio di Husticia y Asutonan Social. E mes un aña, FPNM a eherce un sondeo bou di e 116 Centronan di cuido di mucha, pa asina averigua, kico ta e necesidad na informacion y tayernan cu cabesantenan ta interesa pa ricibi y e training cu e Cabesante ta haya necesario pa su trahadornan pedagogico sigi.

Un total di 63 CdCdM a participa na e sondeo. A base di e resultado aki, a haci un combinacion di loke FPNM ta haya importante pa ofrece y loke e Centronan di cuido di mucha tin necesidad pa ricibi como training. E criterianan di e concepto Manual di Regulacion pa CdCdM a ser usa como base. Di e forma aki a crea e Plan di Desaroyo profesional pa CdCdM. E plan tin un duracion di dos aña, e ta inicia na Augustus 2023 y ta culmina na Juni 2025, cu posibilidad pa extension te 2026.

E Plan di Desaroyo Profesional pa cabesantenan ta consisti di un cantidad di modulo y cada modulo tin un serie di training. E plan pa e trahadornan pedagogico tambe ta consisti di un cantidad di modulo cu su training. Cada modulo ta ser ripiti minimo 4 biaha den transcurso di 2 aña pa asina brinda e oportunidad pa tur Cabesante y Trahador pedagogico participa. E trajectoria di cabesantenan ta poco diferente cu esun di e trahadornan pedagogico. E Cabesante, den mayoria caso, ta na cabes y primeramente y finalmente responsabel pa tur loke ta sosode den e CdCdM, mientras cu e Trahador Pedagogico y varios Cabesante, ta dirigi, entre otro, riba e cuido y e guia di e muchanan den su grupo.

FPNM tin un colaboracion di trabou estrecho cu diferente profesionalnan di, ente otro, Departamentonan di Gobierno, NGO’s y sector priva, cual conhuntamente cu FPNM lo ehecuta e modulanan.

E modulonan ta, entre otro, Seguridad di mucha y personal paden y pafo di e centro cu e enfoke riba seguridad fisico. Pa e modulo aki e participante ta bolbe despues di seis luna of un aña pa practica loke el a sina por medio di un simulacro. Siguiente modulanan ta, Maneho di bo centro den un forma inovativo y efectivo; Derecho laboral & Maneho Financiero y Tecnicanan pa converti conflicto den un conversacion coperativo. Contenido di e modulanan ta varia y cu e enfoke riba cuido y guia di Muchanan entre 0-12 aña.

Algun temanan cu ta forma parti di e modulanan ta, entre otro, Desaroyo di e celebro ‘Kinderbrein’ y e diferente areanan di crecemento; Con pa responde den un forma sensitivo responsivo cual ta e abilidad di e trahador pedagogico pa identifica e estado emocional di un mucha, interpreta e señalnan cu e mucha ta duna adecuadamente y responde na esaki liher y na e forma corecto; Con pa guia muchanan special of cu tin un retraso den nan desaroyo; Con pa compronde bo propio emocion y comportacion (REBT therapy) “Rational emotive behavior therapy” E training aki ta enfoka riba e trahador pedagogico como persona. Pa e trahadornan pedagogico e modulonan menciona ariba ta similar. Aserca di esaki, nan trayectoria ta inclui modulo Movecion & salud y formanan pa incorpora arte y creatividad den un programa di dia. Cada modulo ta finalisa cu un tarea of examen, un dia di evaluacion y “coaching op de werkvloer’ unda e trahador pedagogico ta haya e guia necesario na pia di trabou.

Trahadornan Pedagogico tin un rol sumamente importante. Nan ta pasa varios ora cuidando nos muchanan pa asina mayornan por bay traha trankil. Mirando e laso cu e mucha ta crea cu ne y e impacto cu e tin den bida di tur mucha cu e ta cuida y guia diariamente, nos a formula e modulanan aki. Di e forma aki, huntu cu e trahadornan pedagogico y mayornan ta crea e base firme pa asina crea un impacto positivo den bida di cada mucha.

Team di Fundacion Pa Nos Muchanan ta gradici tur cabesante di centro di cuido di mucha cu a participa na e mainta informativo y ta invita tur Cabesante y trahadornan pedagogico pa inscribi pa participa na e modulonan y training. Alaves FPNM ta gradici su dos boluntarionan, Charisma y Yiusmar y oradornan di e mainta informativo, sra. Dr. Janice Hooft (Jeugd Arts), sr. Drs. Johnny Boekhoudt (Psicologo y Psiclogo Forensico), sra. Kristy Tromp (Budget coach), sra. Barbara Abdoelkariem (Mediator), sr. Giovanni Leocadia (Docente di deporte), sra. Romelinda Maldonado (Artista profesional) y Maestra di Ceremonia Jesseline Soto Garcia – Kelly pa nan tremendo presentacion y colaboracion cu a contribui na un mainta exitoso.