Presidente di fundacion Fondo di Solidaridad Latino Americano, Dr. Carlos Vallejo, no kier compara e candidato Republicano, Donald Trump cu algun politico local den cuadro di eleccion venidero. Pero e ta haya cu na Merca, e participacion y envolvimento di e comunidad Latino Americano ta mas habri cu na Aruba.
Politica na Merca
“Na Merca, e Latinonan ta vota y tambe nan a bay den Parlamento. Nan si tin derecho di participa den e gobierno Mericano”, el a bisa. Na Merca nan sistema si ta cumpli cu e proceso cu ta votado y participante , el a agrega.
Den relacion cu e candidato controversial Republicano di Merca, Donald Trump conoci pa su discursonan tilda como racista contra e inmigrantenan Latino, Dr. Vallejo ta haya cu e magnate aki ta un figura “tipico di su mes y e ta resumen di un figura derechista”. El a indica cu e sector derechista ta buscando e manera di impone su mes.
“Mi no por bisa sr. Donald Trump pa e no ta asina. Mi no por bisa sr. Donald Trump pa no critica un poblacion cu a contribui cu su actividad y cu el a explota nan hopi bon den nan concurso di beyesa y den nan empresanan. Mi no por bisa sr. Donald Trump pa e no ta malvado”, presidente y fundado di fundacion Fondo di Solidaridad Latino Americano a bisa.
E ta haya cu nos mester ta inteligente y analisa cu e guera a crece danki na e industria di arma. Paisnan como Siria y Irak ta wordo bombardia unda miles di hende tambe inocente entre nan muchanan a muri y niun hende ta reaccion. Tampoco tin un minuut di silencio internacional pa nan. Mientras cu den otro pais si tabatin minuut di silencio y reconocemento internacional pa e victimanan di otro atentadonan.
E ta kere cu e tipo di terorismo aki y confrontacion aki mester somenta di nos planeta y respet pa tur ser humano mester prevalece. Pero e ta haya cu e tipo di confrontacion aki no lo somenta, mientras cu tin industria cu ta sigui produci arma. “Nos mester di buki pa educa nos mes. Nos mester di computer pa por siña e sistemanan, nos mester sistema di educacion. Nos no mester di pistol, ni arma largo ni bomba, nos mester instrumentonan pa educacion…”, el a bisa.
Comunidad Latino na Aruba
E ta haya cu e comunidad Latino Americano na Aruba a hunga un rol masha importante riba nos isla. Ta un echo cu e comunidad aki ta un componente importante di e comunidad aki, ya cu nan ta biba akinan, ta inverti akinan, y realisa nan proyectonan akinan, y tambe nan ta eherce nan derecho di voto na Aruba.
“Ya e voto ta link nos cu loke ta wordo yama actividad politico di e comunidad aki”, el a declara na Bon Dia Aruba. E echo cu e comunidad aki por vota y cu nan voto ta contribui pa aumenta e cantidad di voto di nos politiconan local ta wordo eligi y asina haci uzo di poder, e ta haya cu e derecho aki tambe ta duna na e comunidad Latino Americano pa interveni of forma parti di e gobierno.
“Nos no tin un representacion real den e gobierno. No ta importa cu nos a wordo nacionalisa 20 of 35 aña pasa, nos no tin niun derecho ni sikiera di bay den Parlamento di Aruba”, segun Dr. Vallejo.
Representacion real
Dr. Vallejo no ta kere cu ta existi falta di organisacion y falta di union di e comunidad Latino Americano cu ta stroba pa nan tin representantenan, ya sea den parlamento of den gobierno. El a bisa cu e comunidad aki semper ta bon organisa, y un refleho di e organisacion aki ta cu nan a yega di vota y sostene diferente partido.
Como lider di e comunidad Latino Americano, Dr. Vallejo a bisa cu e mes a pasa den tur partido di Aruba buscando un partido cu por representa berdaderamente e moral, deseo y derecho di e hendenan. “Pero mi a haya un gran disolucion!”, el a bisa. Ta dificil pe di permanece den un organisacion politico cu no ta reuni e condicionnan digno cu e por pertenece na dje. E ta un punto cu pa su opinion mester analisa bon, ya cu e ta reconoce cu tabatin gobierno mas miho cu otro pa loke ta e reconocimento y aportacion di e comunidad Latino Americano na e pais aki.
E ta considera cu e comunidad Latino Americano na Aruba ta uno hopi importante pa gewoon adopta un posicion di sumision so y acepta tur cos cu ta wordo dicta. E ta un comunidad di mas cu 30 mil persona, cu nan tin derecho participa tambe den e maneho y decision den seno di e gobernacion.
El a indica cu e comunidad aki ta conta cu miembronan inteligente y bon capacita cu por aporta cu bon solucion na e retonan cu nos pais tin. “Pa ehempel ami personalmente lo por duna miho solucion den salud di loke bo ta kere y di loke bo ta wak actualmente”, segun Dr. Vallejo.
Dr. Vallejo a trece esaki dilanti como “un simpel opinion” personal y e kier trece esaki bon na cla pasobra no ta coherente cu si e Latino Americano su derecho di voto ta importante den cada eleccion y asina aumenta e cantidad di votadonan, e ta haya cu miembronan di e comunidad aki tambe lo por ta bon pa sirbi y aporta cu ideanan na e gobierno pa e construccion di e comunidad aki.
