Durante un conferencia di prensa di Gobierno di Aruba y Crisis Team, Dr. Van Trigt di HAVA a trece dilanti con e procedura di test ta. Ademas a duna informacion tocante e linea telefonico 166, cu a wordo implementa siman pasa.

El a splica cu na e momentonan aki e rekisito pa un persona por test ta hopi abao. Covid-19 ta un sindroma viral cu ta ocasiona door di un virus y e persona mester tin un of mas di e sintomanan como: tosamento, falta di rosea, dolor di garganta, falta di holo of smaak, dolor di curpa/calafriu, asina tambe por tin keintura, nanishi cera of core, cansancio, dolor di cabes, nausea of diarea.

Hopi biaha, Van Trigt a bisa, esaki ta sintomanan secundario cu ta bay hunto cu e sistema respiratorio y si un di e personanan tin algun di e sintomanan menciona caba, por fabor yama dokter di cas pa por haci e test.

“Ta casi imposibel pa distingui un grip di Covid-19. Covid no ta grip, si un persona tin sintoma, keda cas y yama pa test”, Van Trigt a sigura.

Aworaki e procedura pa test un persona mester cuminsa yamando dokter di cas. Su assistent ta meld aan na Test Center di laboratorio di Hospital, Test Center ta yama e persona pa duna un cita. E resultado ta drenta via Aruba Health App, na unda tur persona cu ta haci test mester registra prome. Pa casonan di persona cu no tin un status legal na e isla of ta turista, por yama na 280-0101.

Ora e persona haya e resultado, si ta positivo e mester bay den isolacion inmediatamente y lo wordo contacta pa DVG. Di esaki tin dos escenario: por ta cu e persona ta na comienso di e malesa of ya caba ta den fase di recuperacion, loke ta nifica cu e test ta sali zwak positivo; cu si tin sintoma mester bay den isolacion.

Si e persona no tin sintoma pero su test a sali zwak, esey kiermen cu no ta defini ainda den cua fase e persona ta. Dokternan ta recomenda pa bay tres dia den isolacion y re-evalua despues di tres dia. Si den e tres dia e sintomanan no ta presenta, e persona mester test di nobo pa wak si tin e resolucion di sali negativo of positivo.

Si algun persona ta sinti sintomanan critico, falta di rosea, hogamento of cansancio, mester yama linea di emergencia di dokter di cas. Despues di 7or di anochi of durante fin di siman por yama na 166, cu ta un colaboracion entre dokternan di cas, Cruz Cora Aruba y Ambulance, solamente pa emergencia y no pa test.

El a expresa cu nan como dokter a ripara cu ora un persona tin problema pa hala rosea ta wordo avisa pa bay drumi riba nan bariga, esaki ta yuda cu e fluho di oxigeno y ta duna e persona mas aire den halamento di rosea.

LEAVE A REPLY

Please enter your comment!
Please enter your name here