Durante un reunion di Comision Central cu a tuma lugar dia 18 di juni 2020 Parlamento a aproba e peticion di Minister Glenbert Croes pa, anticipando tratamento di e presupuesto complementario, otorga y paga CEDE Aruba 750.000 florin pa nan por duna e sosten financiero necesario na Fundacion Pa Nos Comunidad (FPNC) pa nan por cumpli cu e peticion grandi pa pakete di cuminda door di nos famianan den necesidad.

Un sosten aki ta sumamente importante mirando e cantidad grandi di extra registracion cu FPNC ta ricibiendo como consecuencia di COVID-19. Na april so FPNC den colaboracion y cu sosten di CEDE Aruba a reparti 2000 pakete di cuminda. Durante un reunion den comision fiho den Parlamento FPNC a indica cu prome cu COVID-19 nan organisacion tabata yuda 150-200 famia cu maandpakket of hulppakket. Awor den e crisis di COVID-19 FPNC tin 3106 famia registra cu ta ongeveer 8600 persona. Un aumento drastico cu mas cu claro tin un impacto grandi riba e organisacion. Nos por conclui cu e situacion ta uno grave y cu Gobierno mester aloca extra fondo pa haci posibel cu FPNC mediante CEDE Aruba por sigui brinda e paketenan di cuminda na nos famianan den necesidad. Actualmente FPNC ta dunando famianan cu ta consisti di 3 a 4 persona un pakete di 450 florin.

Gobierno y demas stakeholders ta consciente cu ta necesario pa FPNC por sigui brinda e sosten aki y ta enfatisa cu mester percura cu e distribucion di paketenan di cuminda ta tuma lugar na un manera eficiente y structural. Na mes momento mirando cu e cantidad di famia ta sigui aumenta y cu tin mas instancia ta ofrece pakete di cuminda mester percura pa tin un bon sincronisacion entre e instancianan pa tur famia den necesidad ricibi e yudansa cu e mester.

Mirando e gravedad di e situacion, awe mas cu nunca nos mester percura pa uni forsa, traha hunto y haci bon uzo di e recursonan cu ta asina limita. Palabranan manera solidaridad y comparti cu bo prohimo nos mester berdaderamente aplica diariamente den nos bida. Ami mescos cu hopi di nos, a lanta den un famia caminda e lema ta ‘unda un por come, tur por come’. Ban sea alerta, ban sea atento y yuda y duna mas.

Mi kier termina cu palabra di sosten y elogia na Minister Glenbert Croes cu a percura pa 11730 persona a ricibi FASE den lunanan di april y mei. 642 peticion mientras tanto a keda aproba y ta pendiente pa pago, 357 ZZP’er a ricibi FASE y 313 peticion di ZZP’ers mientras tanto a keda aproba y ta pendiente pago y cu Gobierno a amplia e criterionan di FASE pa mas grupo meta por ricibi e asistencia aki. Adicional awor Gobierno ta percura pa e fondonan necesario pa haci posibel cu e famianan den necesidad por sigui haya e pakete di cuminda cu ta asina necesario.

Mas cu claro pa finalisa mi mester gradici y aplaudi e tremendo trabou cu FPNC sosteni pa CEDE Aruba a bin ta haci pa nos famianan den necesidad. Hunto nos lo logra pone nos dushi isla y nos famianan bek riba pia.