Minister Xiomara Ruiz-Maduro (MEP)

Dialuna durante e conferencia di prensa, a trece dilanti e carta cu a ser manda na tur radio emisoranan di Aruba, pa cumpli cu e asina yama ‘royalties’. Esaki ta entrante dia 1 di juni.

Minister Xiomara Ruiz Maduro (MEP) ta haya cu ‘e forma no ta bon con e abogado y e compania cu a manda carta ya caba kier cuminsa cu e cobranzanan, esta entrante 1 di juni’.

“E no ta maneho di gobierno, e ta un iniciativa priva, cual artista ta bisa cu nan kier afilia nan mes na dje y pa nan haya e placa fe e compania. Nos como gobierno tin algun pregunta, y nos lo kier yama abogado, sr. Kock, pa asina nos por papia di e intencion a base di cual ley e ta basa su mes. Den e caso aki ley internacional, pero nos kier pa sr. Kock duna nos un splicacion tocante esaki.”

E minister ta splica cu e carta ta bisa cu ta cobra un suma di 3000 florin pa tur radio emisora mensualmente. “Nos kier sa ta con a yega na e suma aki y ken nan ta representa. Hunto cu colega minister, Andin Bikker (POR), nos como gobierno lo busca un opinion legal riba esaki, pa asina por compronde e movecion aki cu ta pasa riba e tereno priva.”

E ta keda na cada doño di radio pa nan por busca nan acesorio legal. “Mester bisa den e caso aki, personalmente mi no ta haya esaki elegante cu ta manda un carta riba 17 di mei y ta wordo pidi pa prome cu dia 1 di juni pa e radio tuma un decision riba esaki, sino lo bay hues. Gobierno ta ocupa reglando algo den ley di locual ta e parti di auteurverordening. Den e concepto aki tin poni cu nos a indica cual instancia lo por haci esaki, ‘pero den e caso aki a bin un iniciativa priva’.

“Si nan kier bon cooperacion cu e radionan, e lo ta bon pa e abogado y e radionan sinta hunto.”

“Nos como gobierno tin e responsabilidad di garantisa libertad di expresion. Como gobierno nos mester ta sigur cu esunnan cu ta eherce derecho ta haya nan fairshare, pero di otro banda, esunnan cu tin un licencia di radio, nan tambe mester por carga e tipo di demandanan aki”, minister Andin Bikker a splica.

“Ami ta remarca, ora bo demanda un tipo di suma, mester sostene esaki. Mester pone conhuntamente cu e carta a base di kico ta yega na un suma di 3000fl. Ora reuni cu e abogado concerni, nos kier haya un splicacion di esaki”, asina minister Bikker a continua.

E abogado lo mester splica cua ta clientenan cu e ta representa, y cua tipo di musica e autor aki tambe ta representa. Tin diferente radio y segmento cu ta toca diferente tipo di musica.

E compania cu e ta representa di Canada, te cu nos sa e Reino Hulandes, ta un compania cu yama Buma/Stemra, e fundacion aki ta esun cu tabata tin un indicacion di e instancia y lo ta esun cu ta apunta pa derecho di autor di henter Reino Hulandes. “E ta straño cu ta un compania di Canada, cu un carta sin ningun splicacion.”

“Nos kier haya un certificacion di cua artista local lo haya nan fairshare. Basta aña nos ta treciendo e derecho di nan dilanti. Lo haci un operacion pa e clientenan, pa asina wanta un rato pa trece mas claridad na e tema, pasobra e fecha 1 di juni ta mucho riba man. Lo reuni cu e abogado concerni, esta sr. Kock, pa asina aclara tur e preguntanan cu gobierno tin”, minister Bikker ta finalisa bisando.