Parlamentario Endy Croes (MEP) ta considera e siman aki como importante, ya cu dia 23, 24 y 25 di mei e caso conoci como IBIS ta bay den corte.
El a recorda cu e caso aki ta esun di ex-minister Paul Croes, cu for di maart 2017 tabata envolvi den un investigacion grandi cu a conduci na su detencion 21 di augustus 2017, caminda e no por subi lista di partido AVP durante ultimo eleccion.
Parlamentario Croes a bisa cu e investigacion aki a wordo lidera pa Ministerio Publico cu participacion di diferente instancia hudicial y investigativo. Den e caso aki tin 30 testigo y un total di 21 sospechoso, cual un di nan ta e ex-minister di Labor, Paul Croes.
E parlamentario a declara cu OM a detecta y nan a bisa den nan publicacionnan cu tin indicacion cu momento DPL ta duna un permiso negativo, e mandatario tabata cambia esaki pa positivo. Nan ta casi 2 mil permiso asina. “Unabes bo ta cambia esaki pa positivo DIMAS su tarea ta bay over duna permiso.”
Segun e legislado ta wordo splica, esaki tabata a cambio di placa y nan ta acusa e minister como culpabel, entre otro di labamento di placa, pone hende ilegal na trabou. Parlamentario Croes ta haya cu esaki tabata otro situacion cu a crea desaster social, ya cu basta hende no a haya trabou -tanto local como esunnan cu a bin di afo y cu nan ta estableci caba- y nan tur a wordo perhudica pa un presunto negoshi di e ex-minister aki.
