Formador pa Gobierno nobo, esta mr. Evelyn Wever Croes, lider di MEP, hunto cu e delegacion di Raiz, encabesa pa Sr. Ursell Arends a haya informacion clave riba e problema alarmante cu e dump na Parkietenbos ta causando na e bario, medio ambiente, y flora y fauna.

Durante e encuentro cu Formador, dia 21 di Juli ultimo, mr. Anouk C. Balentina LL.Mleg. y Sra.. Maribelle Tromp M.P.H. a ilustra cu ya ta pa decadanan largo ta sin un solucion y sin atencion profesional gobernantenan den pasado pa e daño cu e dump di Parkietenbos ta causa, un problema cu cada dia cu pasa ta empeora mas.

Mr. Balentina. y Sra.. Tromp a duna un presentacion cu algun punto importante y a expresa deseonan pa e situacion por mehora. Balentina ta conoci como un activista. Pero su activismo no solamente ta basa riba e hecho cu e ta un persona cu semper di su bida a biba den e bario y ta experenciando locual tur habitante di e area ta biba cune tur dia, e ta ademas un experto den ley. Sr. Tromp ta un experto den salud publico.

Ambos a enfoca ariba e urgencia y a duna idea pa solucion inmediato, pa termino medio y largo. Tambe nan a splica e influencia di e medio ambiente ariba e salud di hende. Pa motibo di e dump unda ta sigui kima, ta expone hende na factornan di riesgo. Di otro banda, si soluciona e dump, e mesun habitantenan lo por haya proteccion for di e medio ambiente cu e ta biba aden.

“Si tin factornan di riesgo den e medio ambiente, esaki tin un influencia negativo ariba salud di hende, cu tur dia ta exponi na un medio ambiente riscante. Medio ambiente y salud ta cana man den man cu otro,” ambos Balentina y Tromp a informa Formador. “Por adapta medio ambiente di manera cu ta crea factornan di proteccion y asina lo proteha e salud di esnan cu ta biba den un bario limpi.”

Actualmente e medio ambiente rond di dump Parkietenbos no ta uno sano y tin bastante factor di riesgo pa e salud di e habitantenan.

Tambe Balentina y Tromp a mustra riba e gravedad di e situacion actual pa Aruba, particularmente den bista di e desaroyonan y tendencianan mundial, SDG’s, Crisis di Clima, tratadonan internacional y violacionnan di leynan relata cu e crimen ambiental cu ta tumando luga na Aruba y Parkietenbos.

“Nos ta spera cu Parkietenbos dump, y e puntonan treci dilanti na Formador no solamente lo bay den e acuerdo di Gobernacion, pero tambe cu e biaha aki si lo actua y resolve e crisis aki,” ta locual mr. Balentina a bisa Bon Dia Aruba. Tanto e, como Maribelle Tromp tin speransa cu e gobernacion nobo aki si lo ehecuta un plan profesional. Un plan compila pa expertonan renombra cu ta reconoci mundialmente, den conhunto cu expertonan local, pa asina remedia e problema aki permanentemente pa Aruba.

Sra. Anouk Balentina ta un hurista cu amplio experiencia y experticio ariba e parti di ley y el a concentra su mes pa e ultimo añanan riba e area di leynan di medio ambiente y tratadonan internacional relata na medio ambiente. Sra. Maribelle Tromp ta un epidemiologo cu amplio experiencia den e area di salud publico. Sra. Balentina y Sra. Tromp no solamente ta profesionalnan riba e tereno di ley y salud pero tambe habitante di Parkietenbos desde cu nan a nace. Pues, no solamente nan tin conocemento di e peligernan y posibel solucionnan, pero nan sa exactamente con e ta pa biba den un medio ambiente cu ta hopi toxico na e momentonan aki. Ambos tin hopi expectativa cu hunto por yega na un solucion cu ta no solamente bon pa Parkietenbos bisindario, pero pa henter Aruba.

LEAVE A REPLY

Please enter your comment!
Please enter your name here