Ora ta papia di anime tin biaha cu personanan ta pensa riba Disney of Pixar, pero sinembargo tambe ta existi otro tipo di companianan cu ta haci animacion na Hapon na unda pa algun tempo a keda conoci serienan como “Dragon Ball Z”, “Naruto” of e popular “Pokemon”.

Esaki ta solamente tres ehemplo di e denomina anime, animacion Hapones cu nan produccionnan a logra surpasa casi 60% di e contenido di television mundial moviendo casi 20 miyon dollar, na unda su publico of ‘target’ ta hopi amplio y cu nan ta crea contenido pa tur hende, for di 0 aña di edad como tambe contenido pa hende adulto.

E origen di e palabra ‘Hentai’ ta nifica pervertido na Hapones y riba internet ta indica cu e ta bin for di e transformacion y liberacion sexual cu a sucede na henter mundo den e decada di añanan 1960, pero e genero aki no ta destina pa transmiti’e via television, ta existi plataformanan riba internet no hopi comercial cu ta ofrece un variedad amplio di serienan dirigi pa publico adulto.

Den internet, ta bisa cu pornografia ta un escape for di realidad, y hopi consumidornan di Hentai ta sigura su mes na e escape aki pa bandona e realidad completo a traves di animacion, y aunke e tipo di anime aki no ta curpanan real, hopi topico cu por haya na hentai pornografia cu ta normalisa violencia contra hende muhe y mucha muhenan, ademas ta normalisa e sexualidad di muchanan homber.

Bon Dia Aruba kier informa comunidad cu e fenomeno aki ta tumando luga na scolnan na unda cu muchanan di 9 aña bay ariba a cuminsa busca videonan riba internet di e tipo di animacion aki, dianan pasa a keda conoci cerca redactor di BDA cu un mama y tata a keda spanta ora nan a haya sa for di un familiar cu su yiu homber di nuebe aña tabata buscando riba internet “Hentai Porn” conoci como anime pornografico.

Di mesun manera BDA a tuma contacto cu Jeanmiree van der Werf ken ta trahado preventivo di Fundacion Respeta Mi pa asina trece dilanti kico mayornan por haci den un caso similar cu nan yiu y con nan tin cu deal cu e situacion.

Na prome luga, el a indica cu esaki tambe ta disponibel den weganan online cu ta involucra muchanan y por sirbi como un herment pa cu abusadonan of pedofielnan por mustra na nan victimanan prome cu abuso lo tuma luga, pa asina nan ta prepara pa e abuso sexual cu ta un di e temanan comun di hentai.

Awendia, hopi mayornan no ta conoce kico nan yiunan ta haci ora nan ta usa un device electronico como telefon, tablet of un computer cu conexion na internet, mayornan no ta consciente di e tipo di pornografia cu cada dia ta mas accesibel dunando e bentaha na muchanan pa nan por wordo absorbe pa algo cu por causa un adiccion pa nan yiu.

Ta p’esey cu e topico aki ta bin dilanti pa asina trece conscientisacion y educa riba e efectonan perhudicial di loke e tipo di anime aki ta haci cu muchanan, cu hobennan y tambe cu adultonan.

Muchanan por wordo exponi boluntariamente y imboluntariamente, na contenido explicito incluyendo pornografia. Pero e pregunta ta: ¿Kico como adulto por haci ora muchanan ta wak pornografia?

Van der Werf a menciona cu no ta por nada ta wordo bisa: ‘Talk to you kids about sex before the internet does’.

Un mucha su desaroyo sexual ta cuminsa di baby caba, ora e mucha bira un peuter/ kleuter e lo por bira curioso pa loke ta trata su curpa, entre otro su parti intimo, e kier sa dicon di dje ta mustra otro cu di su ruman of cu di otro mucha, tambe e kier hunga weganan manera ‘dokter’ pa explora, loke ta importante ta pa mayornan t’ey pa contesta nan preguntanan.

Si ta laga nan cu pregunta, nan mes lo por cuminsa busca contesta y no ta tur ora nan lo ricibi informacion corecto, ta importante pa tuma e siguiente pasonan:

  • Keda calmo: E mucha ya a wordo exponi na pornografia, nada lo por cambia e echo aki. Bis’e cu kier papia cune tocante loke el a wak. Purba di keda neutral y no usa un tono menasante. Si no e mucha ta bay cera y lo no ta habri pa comunica mas. Haci e combersacion ariba e mesun dia, pero no di biaha cu a ripara cu e yiu ta wak pornografia. E meta principal di e combersacion aki mester ta pa haci e mucha ta consciente cu e “sex” cu e ta wak den pornografia aki no ta real y cu esaki ta ful otro cu sex cu ta sosode entre pareha cu ta respeta y consenti pa haci sex cu otro.
  • Si ta haya dificil pa papia di e topico aki, skirbi algun punto cu lo kier trece dilanti ariba un papel. E ta esencial pa ta honesto y usa informacion corecto. Esaki kiermen cu lo mester usa e nomber biologico manera vagina, vulva, penis, ano, pecho, etc. Y no inventa nomber straño pa e partinan intimo. Esaki lo contribui tambe na e disminucion di berguensa asocia na topiconan tocante sexualidad
  • Paso 1: Bisa e mucha cu bo ta na altura cu e ta wak pornografia
  • Paso 2: Bisa e mucha cu no mester tin berguensa pa discuti topiconan di sexualidad y cu e ta ok pa acerca bo si e tin pregunta.
  • Paso 3: Bisa e mucha cu sex en realidad no ta pasa manera e ta wak den pornografia, aki por comparti bo mesun experencia cu sexualidad y por duna splicacion tambe tocante e aspecto social emocional, pero tambe e diferencia entre sex y intimidad.
  • Paso 4: Splica cu “sex” den pornografia ta mustra otro cu e “sex” den bida real, splica e mucha cu cada persona tin un curpa diferente y cu e curpa di e personanan cu el a wak den e video por ta mustra otro cu di dje y esaki ta okay. E splicacion aki ta relaciona cu e autoestima di un mucha, cu lo por cuminsa compara su curpa cu di otro persona

Pa finalisa, ta importante pa encurasha e mucha pa haci pregunta. Sigura e mucha cu abo ta su adulto di confiansa y cu e lo por acerca bo cu cualkier pregunta. E ta importante pa keda habri, honesto y pa no hinca berguensa ni miedo den un mucha.

 

 

 

LEAVE A REPLY

Please enter your comment!
Please enter your name here