E problematico di dump na Parkietenbos ta uno cu tin hopi aña caba ta crece, no tin un solucion pe y aworaki a yega e punto cu e problema aki a bira alarmante. Den un entrevista pa Bon Dia Aruba Sra. Anouk Balentina a elabora ariba e situacion grave cu tanto e y e otro habitantenan den e becindario di Parkietenbos mester soporta tur dia.

E problematica di dump na Parkietenbos ta un problema cu tin mas di 20 aña ta afecta e bisindario aki. Sra. Balentina a splica cu tempo di gobierno di AVP e dump a wordo ubica na Parkietenbos como algo temporal. Esey ta hopi aña pasa caba y e situacion a cambia cu e añanan. E problema no ta solamente e dump, pero e ta algo cu ta concerni full e isla.

Cada turista cu bin Aruba, sea cu avion of den barconan crucero, ta produciendo desperdicio, cual ta agrega na e problematica. Aworaki dump tambe ta haya e desperdicio, e pupu, di e RWZI pasobra RWZI ta yen, dus e holor ta hopi mas vies y esaki ta causa hopi mas musca cu antes.

E realidad ta cu e dump ta un problema cu a bira pio, si compara e dump di antes y e dump di awo, antes e habitantenan tabata keha pa e situacion, pero aworaki e situacion a bira hopi alarmante, den e sentido cu e muchanan, e hendenan di bisindario ta birando malo y vooral e persona cu ta sufri di asma. “Gobiernonan ta bisa nan ta haci un investigacion pa loke ta trata e salud di e hendenan cu ta biba den e bisindario di parkietenbos, pero niun gobierno a haci nada”, Sra. Balentina a bisa.

Na 2018 Panamerican Health Organization (PAHO), a haci un investigacion ariba e maneho di desperdicio na Aruba. E rapport aki ta indica cu e dump na Parkietenbos mester wordo cera inmediatamente door di peliger pa salud y bida di hende. Fuera di esey e rapport di PAHO ta bisa tambe cu no mag di tin un dump asina cerca di un aeropuerto pasobra e ta bira un peliger pa aviacion. International Civil Aviation Organization, un division di Nacionnan Uni, tambe tin normanan cu ta indica cu no mag di tin un dump asina cerca di aeropuerto y Aruba no ta cumpliendo cu e normanan internacional aki.

“E problematica di dump ta un asunto nacional y gobierno tin un responsabilidad y nan mester cumpli cu nan deber di mantene e ciudadanonan di Aruba sigur. Nan tin cu salvaguardia e derecho di bida di ser humano y promove e parti di salud”, Balentina a agrega.

Aña pasa parlamento a pasa ley caminda 16 area di naturalesa na Aruba a keda marca como areanan protegi. E mangelnan na e islanan di rif di Parkietenbos ta cay den e areanan protegi, pero e biento ta hiba huma di e dump directamente ariba e rifnan aki, contaminando e area. Esaki ta un ehempel di con e dump aki ta violando e leynan estableci pa proteccion di naturalesa. Esaki ta un problema ta violando e leynan di proteccion di naturalesa.

Esey ta pone cu e situacion a cambia, e situacion di awo no ta e situacion di 20 aña pasa.

E situacion actual ta cu tin ley pa proteha naturalesa, cu gobierno mes ta violando door di no cera of cambia di localidad e dump aki, y tin un crisis climatico cu Aruba ta aportando na dje tambe pa medio di contaminacion di e mesun dump. “No ta husto cu e persona cu ta biba den e bisindario di Parkietenbos mester inhala e huma toxico di tur e sushinan di Aruba”, Sra. Balentina a señala.

E situacion aki tin un efecto grandi ariba e ciudadanonan di Aruba, pero e lo por tin un efecto negativo secundario ariba e turismo tambe. Manera e rapport di PAHO ta indica, e ta contra di normanan internacional pa ti un dump asina cerca di un areopuerto pasobra esaki ta un peliger pa aviacion. Turistanan cu ta bishita nos isla por realisa cu e dump ta un riesgo pa seguridad di aviacion y scoge pa no bishita Aruba mas. Naturalesa tambe ta sufriendo pa medio di e contaminacion di e dump, y sin naturalesa Aruba no lo ta atractivo mas pa e turistanan.

“Mester busca un solucion urgente pa e problema di maneho di desperdicio na Aruba. E problema aki no ta responsabilidad di e Minister di Naturalesa, Ursell Arends solamente, e ta un responsabilidad di gobierno completo”, el a indica.

Balentina ta enfatisa cu otro tur minister tin un parti di responsabilidad pa e situacion di Parkietenbos.

Minister di Salubridad Publico y Turismo, Sr. Dangui Oduber, mester realisa cu e dump ta afectando salud di habitantenan. E Rapport di PAHO ta wordo ignora, gastonan di medicamento adicional ta un peso ariba AZV, hendenan ta sufri malesanan cronico causa pa e huma toxico, turismo ta keda aumenta, RWZI ta full, turista- y cruceronan ta laga nan desperdicio akinan.

Prome Minister Evelyn Wever-Croes ta na altura cu e localidad di e dump ta causa contaminacion directo di e awanan teritorial y e huma toxico ta bay directo ariba e area demarca protegi, pero ainda no a tuma decision pa cambia e localidad.

Minister Geoffrey Wever como minister di desaroyo sostenibel tin cu realisa cu e situacion na dump ta bay contra e principionan di desaroyo sostenibel. Kimamento di sushi den aire liber no ta sostenibel, incinerator tampoco.

Sr. Endy Croes, Minister di Enseñansa y Deporte y tambe Sr. Rocco Tjon, Minister di Husticia y Asuntonan Social, tin un responsabilidad pa e muchanan cu ta wordo afecta socialmente y ora e muchanan bira malo, esaki ta afecta nan educacion y nan bida social.

Mas cu claro e problematica aki ta responsabilidad directo di Sr., Ursell Arends, Minister di Integridad y Naturalesa. Manera Sra. Balentina a menciona caba, e dump na Parkietenbos ta afecta e naturalesa directamente y esaki ta contra e ley cu recientemente a demarca e areanan di rif Bucuti y Parkietenbos como area protegi pa ley.

“Gobierno tin un obligacion di cuido, conforme nos regulacion estatal, un obligacion pa cu cada ciudadano cu ta biba na e pais pa por biba den un ambiente sano y sigur. Cada ciudadano tin e derecho fundamental di bida.”, Sra. Balentina a expresa.

 

LEAVE A REPLY

Please enter your comment!
Please enter your name here