Den e dianan aki presion politico a cuminza subi. Esey ta pasobra cierto informacion di banda di gobierno no por keda sin divulga mas, pasobra a palabra cu Hulanda pa haci esey. Asina anto ultimamente tabatin mas claridad riba continuacion di e reduccion di salario di empleado publico y personal di entidad semi-publico, anuncio di un impuesto indirecto nobo, cu por ta solamente un BTW, anuncio di corta gasto di 11 miyon florin den enseñanza, anuncio di austerisacion den AZV, cu probablemente un ‘eigen bijdrage’ pa e ciudadano… Esun cu tabata keha cu gobierno no ta bisa nada, awor a haya nan gana, aunke talvez e mensahe tampoco lo ta di nan agrado. Aunke nunca nos tin problema cu critica gobierno, nos tin e obligacion tambe di trece dilanti, mas obhetivamente posible, kico ta e situacion actual y con realistico e plannan ta, y e critica riba nan di otro banda.

Pa cuminza esey ta trece nos riba e situacion financiero general di Pais Aruba. For di e recien publica rapport di kwartaal 3 di 2021 por destila cu gobierno ta hayando algo menos cu loke tabata anticipa, aunke cu e influencia di temporada di fin di aña por percura cu gobierno ta termina aña cerca di e suma proyecta na entrada, cu ta e suma presupuesta di Afl. 1.062 myon. Di otro banda, di e deficit presupuesta, cu ta Afl. 762 miyon, probablemente un parti no lo keda realiza, felizmente, mirando cu e gastonan haci tambe a bira menos. Sin embargo, ta obvio cu e aña aki ainda nos ta financiando cu prestamo un buraco di centenares di miyon.

Y awor e problema pa 2022. Ta conoci cu CAft y gobierno Hulandes ta insisti riba un presupuesto balanza pa otro aña, y esey lo implica cu gobierno mester economiza fuertemente. Ta anticipa cu economia lo sigui mehora, pero na mitar di e ritmo di e aña aki, un 7,1% envez di e 13,9%. Esey ta bisa cu gobierno lo mester por conta cu algo mas na entrada cu e aña aki, pero no dramaticamente mas tampoco. Cifra? Por ehemplo, aña pasa gobierno a cobra na entrada total Afl. 1.062 miyon, y na impuesto Afl. 937 miyon. E aña aki tin proyecta capta en total Afl. 1062, y na impuesto algo mas di Afl. 950 miyon… Esey ta bisa nos cu e mehoracion di economia e aña aki no ta resulta den tanto mehoracion pa caha di gobierno. Di e manera aki nos ta keda leu di e entradanan total cu gobierno a haya na 2019, cu tabata Afl. 1.402 miyon, y cu aña pasa a cay back cu mas di 300 miyon florin. Si acaso tabata spera un mihor cobranza di e medidanan fiscal nobo, esey no lo tuma lugar na 2022 ainda, cu introduccion di BTW na januari 2023.

Pregunta anto na tur actor, politico o no: con ta kere cu ta yega na un ‘balanced budget’ si tin eynan un abismo di varios centenar di miyon pa cubri? Bisando e sindicatonan cu ta representa empleado publico y personal semi-estatal cu den curso di 2022 nan ta haya nan 12,6% atrobe? Really? Gobierno por bisa esey pa nan baha for di su lomba, pero e realidad financiero ta totalmente otro. Finalmente, segun cifra di CBA, gobierno a spaar algo mas di 10% compara cu e suma gasta na 2019 na personal, y no 12,6%. Realmente e austerisacion den enseñanza di 11 miyon florin ta parce nos un di e medidanan menor, unda e ministro nobo a opta pa duna claridad, mientras tur su otro coleganan a opta pa keda keto. Aunke e contribucion di enseñanza pa cera e gap pa yega na un presupuesto balanza ta minimo, pero nos por imagina cu e mandatario a pensa cu mihor e no lanta tur tipo di expectativa, mientras no tin placa pa nada. Nos mester warda pacientemente pa haya sa di e otronan ora presupuesto 2022 bira publico? Ta bon.

Otro tema grandi ta AZV. Ta facil pa duna opinion, y mas ainda si nos no ta contempla e cifranan. Aña pasa gobierno tabatin e obligacion – legal – di contribui 100 miyon florin na AZV pa por a cera aña. A corta alrededor di 38 miyon florin, segun gobierno, y asina mes, cu tur e problemanan di Covid-19, AZV a termina surpasando su presupuesto. Y ademas, fuera di Covid, e otro factornan cu ta pusha gasto di AZV bay halto no ta para nan accion. Y ta haci cu en berdad, manera Promer Ministro a bisa, den e añanan cu ta bin nos gastonan medico ta surpasa loke nos por contribui. Ademas, pa 2023 ta surgi mas pregunta. Ta bay termina e BBO dedica legalmente na AZV, pasobra e BBO ta bay? O ta hinca un parti dedica na AZV den e BTW? O gobierno ta purba sali di e responsabilidad legal pa cubri deficit di AZV, manera a ser conseha varios biaha caba? Esaki ta e realidadnan grandi presente den nos cara henter ora, pero den tempo di campaña ta priminti lo contrario. Ta facil pa bisa awor cu “ta Hulanda ta obliga nos”, pero si nos tabata un pais independiente, ta ken a causa y ta obliga di remedia e situacion aki? Politico na Aruba mester ta contento cu Hulanda: nan ta yuda y ademas, ora mester un excusa – barata – tambe nan t’ey.

 

LEAVE A REPLY

Please enter your comment!
Please enter your name here