Tin un retraso hopi grandi pa loke ta trata otorgamento di rijbewijs; e examen di teoria y henter e proceso pa bo yega na un rijbewijs. Pa varios tempo caba e departamento a pidi pa mas personal pero nunca a haya esaki.

Gobierno a constata cu tin un lista di warda cu un duracion di 9 luna pa bo haya bo rijbewijs. “Y esey ta sumamente hopi largo”, segun minister di husticia Andin Bikker (POR). Gobierno a reuni cu korpsleiding pa inventarisa e problemanan y constata cu ta haci falta di personal y capacidad. Minister Bikker a anuncia ayera cu pronto e prome stap lo ta pa huur un edificio specificamente pa e departamento tin mas capacidad y tambe lo bay over na automatisacion.

Edificio neglisha
E edificio di departamento di rijbewijs na St. Cruz no ta den mucho bon condicion tampoco y ta mustra neglisha pa un tempo caba. Manera cu nos a yega eynan ayera pa tira un bista, e prome cos cu e empleadonan ta dirigi na nos ta con e palomanan cu tin e luga na werki. Ta haci falta di borchinan tambe pa dirigi e personanan na cierto areanan di e edificio, mayoria ta djis papel riba porta pa describi e area. Director interino na departamento di rijbewijs Johnny Wout ta bisa Bon Dia cu nan no ta mucho na altura riba e cambionan na caminda. Pero sr. Wout ta bisa cu for di basta tempo nan ta falta personal.

“Pa motibo di esaki tin retraso. Antes normalmente nos tabata haya por ta dos diasabra pa luna pa traha overtime y haal in esunnan cu no a pasa examen. Por lo menos 40 hende riba diasabra pa coremento so.” For di aña 2015 segun sr. Wout, a stop cu overtime y tur e hendenan ey cu mester bolbe pasa examen mester haci esaki den siman. Ora nan haci esaki nan ta gara luga di otro hendenan cu por a bin riba e fecha ey segun sr. Wout.

Pa e motibonan aki e departamento tin awo por lo menos dos aña ta pidi pa personal y ta haya esaki ta e solucion pa tur problema. “Nos ta pidi y pidi pero nos no ta hayando.” E edificio unda nan ta awor ta uno chikito pa nan tambe, nan no tin ni un luga pa come. Riba locual ta e computernan: “Mi tabata tin casi tres siman sin computer. Nan ta drech’e, e ta traha un dia y despues e ta bay. Mester bolbe warda atrobe anto esaki ta pega e trabao”, sr. Wout ta bisa. Nan ta bisa cu si ta bay automatisa e sistema mes, toch lo keda mester mas personal.

Proceso di teoria reduci na tres luna
Automatisacion riba e parti di teoria pa haya rijbewijs ta tumando luga na Hulanda pa hopi tempo caba. Minister Bikker a anuncia ayera durante un rueda di prensa cu nan ta anticipa cu e proceso di teoria pa haya bo rijbewijs lo cuminsa na reduci esaki na no mas cu tres luna.

“Pero unabes e aspecto di teoria y examen wordo automatisa, practicamente no ta bay tin lista di espera mas. Djis un tiki pasenshi”, segun minister Bikker. Banda di esaki, gobierno a pensa di haci un apelacion na esunnan cu a traha den e departamento, tin e experiencia y awor ta riba pensioen. Si nan por bin un rato reforsa e departamento pa atende cu tur retraso cu por tin. “Manera conoci, nos ta den un fase di transicion pa loke ta trata korpsleiding. Tin hopi temanan manera esun di rijbewijs cu a keda pendiente. Awor asina cu e korpsleiding nobo asumi cargo, en todo caso esaki ta bay tin prioridad. Nos tin basta dia caba trahando riba esaki y dunando e su debido atencion”, e mandatario a splica. Coleganan di prensa a puntra e minister con largo e proceso aki lo dura pa inicia pero e mandatario no a duna un indicacion di esaki.

Link sistema di Censo online
Tabata tin un diferencia di opinion entre minister Bikker y minister anterior encarga cu husticia riba e proceso di rijbewijs. Hefe di Censo tambe a trece algun punto dilanti riba esaki segun minister Bikker.

“Tin un sistema awor cu ta riba su mes cu ta produci e carchi di rijbewijs cu no tin link cu Censo. Esey ta pone cu den proceso ora cu haya e documento di Censo, e mester wordo manualmente introduci den e sistema eynan.”  E mandatario a bisa cu pues nan kier bay den e direccion di link cu e sistema di Censo online pa e tipo di fout aki no tuma luga mas. Los di esaki, lo mester bay wak bon den algun tratado internacional cu tin cierto preocupacion pa loke ta trata siguridad.

Sr. Bikker: “Na final di dia un rijbewijs no ta solamente wordo mira como prueba cu bo por maneha un vehiculo. Pero los di esey e ta wordo acepta tambe como identificacion. Mester evita pa tin un situacion unda e documento no ta cuadra, y of hasta personanan cu no ta mester tin un documento asina lo por tin e.” Esaki ta retonan y preocupacionnan cu a bin dilanti, no necesariamente cu esaki ta pasa segun minister Bikker, pero ta puntonan cu tin atencion di gobierno.