Den siman di 28 di december te cu ayera 3 di januari, Aruba su turismo a haya e bishita di alrededor di 12.700 pasahero.

E cifra ultimo aki a yuda pa e resultado di december 2020 ta mas fuerte pa loke Aruba Tourism Authority (ATA) a spera, despues di experiencia un aña tras di lomba di hopi reto. Ya cu e impacto di e pandemia di Covid-19 tabata uno riparabel pa nos principal sector economico.

2020 un aña unico

Directora di ATA, Ronella Croes a cualifica 2020 como “un aña unico.” Te hasta nan a saca un spot cu a tilda 2020 como “un aña inolvidabel.”

E contexto di e palabra inolvidabel ta uno cu 2020 ta un aña cu nos no por lubida pa diferente motibo. E impacto cu nunca nos por a mira prome pa medio di un crisis. Pero e palabra “inolvidabel” tambe tin pa Ronella Croes un contexto positivo, esta ATA como organisacion por a pasa den experiencia cu nunca nan a yega di pasa den dje. Nos por a mira un ATA cu mester a cambia su manera di traha.

Un organisacion cu mester bin cu iniciativa y tambe nan a traha hopi mas estrecho cu otro organisacionnan manera esnan di e sector medico, cu normalmente nan no ta traha estrecho cu nan. ATA a hunga un papel clave como miembro di e Crisis Team nacional, unda a wordo tuma decision hopi dificil y unico pa henter comunidad.

Pero tambe nos por a mira un ATA cu mester asumi un rol importante di duna guia y informacion na e sector di turismo. Un tarea nada facil di informa den e mesun momento e realidad di kico nos lo por spera pa nos principal pilar economico, sin pone un banda parti di motivacion. “Ta diferente papel cu nos a hunga,” el a bisa.

Na aña 2020 ATA a forma un comision hunto cu sector priva y aeropuerto, unda nan a traha riba un plan di recuperacion di turismo. Nan a lidera diferente trayecto importante treciendo tur partido hunto cu ta necesario como parti di e reapertura na juni pa nos turismo. Nan a lidera e produccion di e plataforma di migracion online. Como parti di e reapertura tambe ATA a lidera e iniciativa di Aruba Health and Happiness Code.

Ademas di e rol aki y pareu cune, ATA mester eherce su trabao esencial di keda mantene un cierto presencia y posesion internacional di nos industria turistico. El a splica cu ATA a yega di adapta esaki conforme na e situacion cu a presenta, pero tambe nan a adapt’e tambe na locual e consumidor kier scucha.

December 2020

Mirando e cantidad di bishitante cu nos a conoce durante cambio di aña 2020 pa 2021, nos turismo a habri cu bon pia.

Directora di ATA a duna na Bon Dia Aruba e prome impresion divulga na prensa con luna di december a bay. Un aña clave y importante den e proceso di recuperacion y reactivacion di Aruba su economia.

Segun directora di ATA for di october cada luna Aruba a ricibi mas bishitante. No mester lubida cu september ultimo tabata e luna cu nos a mira e bahada drastico mara tambe na e cantidad di caso positivo cu a subi riba nos isla.

ATA a yega di premira cu luna di december lo bira uno cu Aruba lo haya mas turista. Pero te siman di mita di december, ATA tabata sperando un total di rond di 37 mil. Pero mirando e ultimo cifranan cu a drenta cerca nan, ATA ta calcula cu nos pais a ricibi entre 40 mil pa 45 mil turista na luna di december.

Esey ta pone nos mas cerca di escenario conservativo. Kiermen cu Aruba ta cerando su turismo 2020 cu un caida alrededor di 68% pa 70% compara cu 2019, segun Ronella Croes. E caida lo ta den tendencia cu locual otro destinacionnan clave den Caribe ta mirando tambe.

Hasta destinacion manera Republica Dominicana y Mexico cu tin rekisitonan hopi mas leve, pero cu nan ta mustrando e mesun grado di recuperacion turistico. Mientras cu Aruba tin rekisitonan hopi mas restringente pa atende cu Covid.

Otro bon señal -segun Ronella Croes- ta cu ATA su resultado pa 2020 lo ta den linea cu loke Organisacion Mundial di Turismo (WTO) ta bisa. E organisacion mundial aki ta conclui cu turismo ta cay cu 70% na 2020 compara cu 2019. “Nos ta den linea cu e tendencia di kico ta e grado di recuperacion,” el a bisa.

Preocupacion

Sinembargo e ultimo dianan nos ta mirando mas casonan positivo di Covid na Aruba, caminda Crisis Team ya a anuncia mas medidanan.

ATA ta considera e medidanan aki importante mirando e casonan. Pero tambe pa evita cu e situacion aki por impacta e continuacion di e temporada halto aki.

Nos por a mira durante e fin di siman aki cu nos a cuminsa januari 2021 hopi fuerte. Pero man den man cu esey, ya Crisis Team ta papiando di nan preocupacion cu e aumento di casonan positivo di Covid-19 cu por impacta turismo. Esaki ta un aspecto cu mester tene cuenta cune y ahusta unda cu tin mester, segun directora di ATA.

 

Apesar di e caida aki, e ta haya cu e bon señal ta cu berdaderamente nos a haya mas bishitante di loke nos a spera den luna di december. Apesar cu for di october nos ta conociendo un aumento riba nos cantidad di bishitante, Ronella Croes ta adverti cu e tendencia positivo aki a sigui sosode na december.

No obstante na cierto complicacion cu a sosode durante e ultimo luna di 2020 por ehempel cu e mercado Hulandes, pero tambe cu un aumento di casonan positivo na Merca.

Directora di ATA a interpreta e desaroyo turistico cu no a conoce durante ciere di aña 2020, cu e hendenan ta sigui mustra di kier biaha y ta sigui scoge Aruba.